Týberkýlez aınaladaǵylarǵa qaýipti aýrý emes - dárigerler
ALMATY. QazAqparat - Qazirgi medıtsına jetilgen zamanda týberkýlez aınaladaǵylarǵa qaýipti aýrýlar qatarynan shyǵyp keledi. Bul týraly búgin Almatyda Óńirlik kommýnıkatsııalar qyzmeti alańynda dárigerler aıtty.
QR DSM Ulttyq ftızıopýlmonologııa ǵylymı ortalyǵynyń dırektory Málik Ádenovtyń aıtýynsha, jylyna Qazaqstanda 8,5 mln adam skrınıngtik tekserýden ótedi.
Tekserilgen azamattardyń ishinen aýrý belgileri tabylǵan adamdar birden baqylaýǵa alynyp, tez arada emdele bastaıdy.
«Týberkýlez aýrýy tabylǵan adamdardyń 70 paıyzynda aýrýdyń juqpaly emes formasy, al qalǵan 30 paıyzynda juqpaly forma bolady. Biraq sonda da týberkýlez aýrýy qaýipti emes. Ol burynnan qalyptasqan stıgma. Ol kezderde tez anyqtaıtyn dıagnostıkalyq tehnologııalar bolǵan joq. Dárigerler buryn ol adamǵa qandaı dári berý kerek ekendigin sheshkenshe 2,5 aı kútetin. Qazir 2 saǵattyń ishinde aýrý juqpaly ma, emes pe sony anyqtap bere alady. Naýqas adam qazir burynǵydaı qaýipti emes. Olardyń 70 paıyzy ádettegideı jumys istep, oqýyn oqı berse bolady. Qalǵan 30 paıyzy ǵana burynǵydaı 7-8 aıǵa emes, 2 aıǵa ǵana oqshaýlanady», - dedi Málik Ádenov.
Almaty qalalyq aýdanaralyq týberkýlezge qarsy dıspanseriniń bas dárigeri Janar Sapıevanyń aıtýynsha, Almatyda jylyna 272 adam týberkýlezdiń juqpaly túrine shaldyǵady eken.
«Negizi Almaty boıynsha kórsetkish óte tómen. 100 myń adamǵa shaqqanda 35,1 adamda týberkýlez anyqtalady. Jylyna 680 jaǵdaı tirkelse, onyń 40 paıyzy juqpaly, ıaǵnı batsıllıarly túrge shaldyǵady», - dedi Janar Sapıeva.
Alaıda, bul naýqastardyń 97 paıyzy aýrýynan tolyq aıyǵa alady.
«Júrgizilgen em-domnyń arqasynda 1 aıdan soń-aq bul kisiler jumysqa shyǵyp, emhanaǵa qarala alady», - dedi Janna Sapıeva.
Qazaqstanda búginde týberkýlezge qarsy qyzmettiń jumys jasaýyna, dárigerlerdiń jalaqysyna, dári-dármekpen qamtýǵa jylyna 42 mlrd teńge bólinedi.
Sońǵy 10 jylda týberkýlezge shaldyǵý jaǵdaıy 2,4 esege tómendep, 2017 jyly 100 myń halyqqa shaqqanda 52,2 adam aýyrǵan. 10 jyl buryn bul kórsetkish 126 bolatyn. Ólim-jitim jaǵdaıy 100 myń halyqqa shaqqanda 6 esege tómendegen.
