Túbegeıli is-sharalar qabyldanbasa, 2060 jyly parnıkti gazdar shyǵaryndylary artady - Brekeshev

NUR-SULTAN. QazAqparat – Túbegeıli is-sharalar qabyldanbasa, 2060 jylǵa qaraı parnıkti gazdar shyǵaryndylary artady. Bul týraly QR Ekologııa, geologııa jáne tabıǵı resýrstar mınıstri Serikqalı Brekeshev aıtty, dep habarlaıdy QazAqparat tilishsi.

«Global Carbon Atlas sońǵy málimetterine qaraǵanda, Qazaqstan Respýblıkasy 221 eldiń ishinde kómirqyshqyl gazy shyǵaryndylary kólemi boıynsha 21-orynda, al halyqtyń jan basyna shaqqanda shyǵaryndylar boıynsha 11-orynda jáne jalpy ishki ónimniń kómirtekqamtymdylyǵy boıynsha 5-orynda tur. 2019 jyly elimizdegi parnıktik gazdar shyǵaryndylarynyń kólemi 364 mln tonnadan asyp tústi», - dedi ol «Parıj kelisiminiń maqsattaryna qol jetkizý joldary jáne Qazaqstannyń kómirtegi beıtaraptylyǵy» halyqaralyq konferentsııasy barysynda.

Onyń atap ótýinshe, buǵan deıin Qazaqstan Parıj kelisim aıasynda 2030 jylǵa qaraı shyǵaryndylar kólemin 1990 jylǵy deńgeıden 15 paıyzǵa, al halyqaralyq qoldaý bolǵan kezde 25 paıyzǵa qysqartý mindettemesin alǵan.

«Boljamdarǵa sáıkes, júzege asyrylatyn saıasatty transformatsııalaý jóninde túbegeıli is-sharalar qabyldanbaǵan jaǵdaıda 2060 jylǵa qaraı jalpy shyǵaryndylardyń kólemi artyp, 473 mln tonnadan astamǵa jetpek», - dedi Serikqalı Brekeshev.