Týa bitti júrek aqaýy neden paıda bolady — dáriger túsindirdi
ASTANA. KAZINFORM — Búgin Astanada týa bitken júrek aqaýy bar balalarǵa arnalǵan tegin keńester men dıagnozdan keıingi ómir týraly alǵashqy Public Talk ótip jatyr. Іs-sharada UMC Klınıkalyq akademııalyq pedıatrııa departamentiniń dırektory, shtattan tys bas balalar kardıology Tatıana Ivanova-Razýmova týa bitti júrek aqaýynyń sebepteri týraly aıtty.
Dárigerdiń sózinshe, týa bitken júrek aqaýlarynyń shamamen 50 paıyzy genetıkalyq ózgeristermen baılanysty. Alaıda mundaı aqaýlardyń túri óte kóp bolǵandyqtan, ony bir ǵana genniń ózgerýimen túsindirý múmkin emes.
— Keıbir tuqym qýalaıtyn aýrýlar bir genniń ózgerýinen paıda bolady. Al týa bitti júrek aqaýlarynda birneshe gendegi ózgerister qatar júrýi múmkin. Sondyqtan olardyń naqty bir ǵana sebebin ataý qıyn, — dedi Tatıana Ivanova-Razýmova.
Onyń sózinshe, júktiliktiń alǵashqy aptalarynda ananyń juqpaly aýrýmen aýyrýy da áser etýi múmkin.
— Sábıdiń júregi júktiliktiń 2-8 aptasynda qalyptasady. Osy kezeńde anasy túrli ınfektsııalarmen aýyrsa, sol da áser etýi múmkin. Biraq belgili bir faktor júrek aqaýyna tikeleı sebep bolady dep naqty aıtý múmkin emes, — dedi dáriger.
Sondaı-aq maman shamadan tys kún sáýlesiniń áseri nemese qorshaǵan orta faktorlary týraly da túrli boljamdar bar ekenin atap ótti.
— Alaıda olardyń eshqaısysy týa bitti júrek aqaýynyń naqty sebebi retinde dáleldengen joq, — dedi spıker.
Aıta keteıik, elimizde jyl saıyn 4 myńǵa jýyq bala júrek aqaýymen dúnıege keletinin jazǵanbyz.
