Týa bitken patologııadan bolatyn náreste ólimi 15%-ǵa tómendedi
ASTANA. KAZINFORM – 2024 jyldan bastap Qazaqstanda fetaldyq medıtsına damyp keledi. Bul týraly DSM baspasóz qyzmeti habarlady.
2024 jyldan bastap Qazaqstanda fetaldyq medıtsına damyp keledi — bul uryq patologııalaryn jatyrishilik emdeý baǵyty. Jańa tásilderdi engizý týa bitken damý kemistikterin erte anyqtaýdy 10%-ǵa arttyryp, týa bitken patologııalardan bolatyn náreste ólimin 15%-ǵa tómendetýge múmkindik berdi.
Balalar onkogematologııalyq kómegin damytýǵa erekshe nazar aýdarylyp otyr. Medıtsınalyq uıymdarda ımmýnogıstohımııa, ımmýnofenotıpteý, joǵary dozaly hımıoterapııa jáne organ saqtaýshy hırýrgııalyq tehnologııalar sııaqty zamanaýı dıagnostıkalyq jáne emdeý ádisteri engizilip jatyr.
Profılaktıkalyq medıtsınany damytý da mańyzdy baǵyt bolyp qala beredi. Balalarǵa týǵannan bastap neonataldyq, aýdıologııalyq, oftalmologııalyq jáne damý skrınıngteri júrgiziledi. 2025 jyldyń qorytyndysy boıynsha neonataldyq skrınıngpen qamtý 96%-ǵa, aýdıologııalyq skrınıng 87%-ǵa, damý skrınıngi 90%-ǵa jetti.
Mektep jasyndaǵy balalar úshin bilim berý uıymdarynyń bazasynda medıtsınalyq súıemeldeý júıesi uıymdastyrylǵan. Mektepterge emhanalar bekitilip, 6,5 myń medıtsınalyq pýnkt jumys isteıdi, onda 6,6 myń mektep meıirbıkesi jumys isteıdi.
Balalardyń stomatologııalyq densaýlyǵyna erekshe kóńil bólinip otyr. «Bolashaqqa — saý tispen» baǵdarlamasy sheńberinde barlyq mektepte tis dárigerlik tekserýler men tisjegi profılaktıkasy engizildi. 2025 jyly 125 mektepte stomatologııalyq kabıneti ashyldy.
Jasóspirimderdi qoldaý úshin jastar densaýlyq ortalyqtarynyń jelisi damyp keledi. Búginde elde 10–18 jas aralyǵyndaǵy balalar men jasóspirimderge profılaktıkalyq, psıhologııalyq jáne konsýltatsııalyq kómek kórsetetin 85 jastar densaýlyq ortalyǵy jumys isteıdi.
Sondaı-aq medıtsınalyq-sanıtarııalyq alǵashqy kómek uıymdarynyń bazasynda 97 psıhıkalyq densaýlyq ortalyǵy jumys isteıdi, onda ata-analar men balalar emotsııalyq jáne psıhologııalyq jaǵdaı boıynsha bilikti kómek ala alady.
Mınıstrdiń aıtýynsha, balalar densaýlyǵyn saqtaý júıesin odan ári damytý Memleket basshysynyń tapsyrmasymen ázirlengen «Qazaqstan balalary» 2026–2030 jyldarǵa arnalǵan tujyrymdamasy sheńberinde júzege asyrylady.
— Balalar sanynyń artýy jańa tásilder men júıeli sheshimderdi talap etedi. Búgin biz profılaktıkany kúsheıtý, mektep medıtsınasy men skrınıngterdi jetildirý, patronajdy damytý, balalardyń psıhıkalyq densaýlyǵyn qoldaý jáne óńirlerdiń arasyndaǵy qoljetimdilik teńsizdigin azaıtý mindetterin qoıyp otyrmyz. Osy baǵyttar «Qazaqstan balalary» tujyrymdamasynyń negizin quraıdy, — dedi Aqmaral Álnazarova.
Tujyrymdama profılaktıkalyq medıtsınany damytý, skrınıng baǵdarlamalaryn jetildirý, balalardyń erte damýyn qoldaý, mektep densaýlyǵyn nyǵaıtý, ımmýndaýmen qamtýdy arttyrý jáne turǵylyqty jerine qaramastan medıtsınalyq kómektiń teń qoljetimdiligin qamtamasyz etý sharalaryn qamtıdy.
Sonymen qatar, 2026 jyly mektep oqýshylaryna profılaktıkalyq medıtsınalyq tekserýlerge jańa tásilder engizý jáne jastar densaýlyq ortalyqtarynyń qyzmetin jańǵyrtý josparlanyp otyr.
Bul sharalardyń keshendi iske asyrylýy balalar men náresteler óliminiń kórsetkishterin odan ári jaqsartýǵa, mamandandyrylǵan kómekke qoljetimdilikti keńeıtýge jáne Qazaqstandaǵy árbir balanyń deni saý damýyna jaǵdaı jasaýǵa múmkindik beredi.
Aıta ketelik elde balalar densaýlyǵyn saqtaýǵa bólinetin qarjy eki ese óskeni týraly jazǵan edik.
