Tý ustaýshy Abzal Ájiǵalıev pen Ekaterına Aıdova tarıhı obrazda shyǵady
QR Ulttyq olımpıada komıteti habarlaǵandaı, olar saq patshaıymy Tomırıs pen qazaq batyrynyń keıpinde el aldyna shyǵady.
Komandanyń tý ustaýshylary kıetin kıimle negizinen qazaqtyń ulttyq oıý-órnegi «qoshqar múıiz» beınelengen.
Aıta ketelik, órnek elementterin dızaınerler Ábilhan Qasteev atyndaǵy memlekettik óner murajaıymen birlesip daıyndady. Tokıo-2020 Olımpıadasynda da osyndaı qadam jasalǵan bolatyn.
Al Japonııadaǵy jazǵy oıyndarǵa tý ustaýshylardyń kıimin tikken dızaıner-modeler Vıoletta Ivanova Beıjiń Olımpıadasy tý ustaýshylarynyń formasyn da daıyndady.
«Tý ustaýshylardyń kostıými óz eliniń dástúri men mádenıetin pash etedi, sondyqtan, bizdiń basty maqsatymyz da osy boldy. Qazaq halqynyń erkin rýhyn urpaqtan urpaqqa jalǵasyp kele jatqan baı tarıhynan artyq eshteńe beıneleı almaıtyny anyq. Qazaqtyń batyrlary men Tomırıs patshaıymy týraly ańyzdardy biz de, barsha álem de biledi. Kostıýmdi daıyndaý kezinde osy bir qyzyqty oqıǵalardy basty nazarǵa aldym», - deıdi dızaıner.
«Órnektiń negizinde barsha álem halyqtary ejelden qurmetteıtin, eń myqty energııa kózi sanalatyn kún jatyr. Bul tek myqtylarǵa – jeńimpazdarǵa baǵyttalǵan. Bizdiń basty batyrlarymyz – sportshylar, olımpıadashylar tártipke berik, maqsaty anyq, óz armandaryna senimdi qadam basqan, bala kúninen beri basty maqsatyna jetý úshin eńbektengen jandar», - dep atap ótti ol.
Qazaqstandyq modelerdiń aıtýynsha, oıynnyń ashylý saltanatyna arnalǵan formany daıyndaý qıynǵa soqqan. Sebebi, jumys kezinde klımattyq erekshelikterdi de eskerý qajet.
Áıel adamǵa arnalǵan kostıým palto jáne qolmen órnektelgen biregeı sáýkeleden turady. Bul kostıýmdi qazaqstandyq sheberler 3 aı boıy, árbir santımetrin óz qolymen daıyndaǵan. Kóptegen antıkalyq avtorlardyń shyǵarmalarynda kezdesken ári myńdaǵan jyldar boıy ańyzǵa aınalǵan Saq patshaıymy osy týyndyǵa arqaý bolǵan.
Áıel adam kostıýmindegi «qoshqar múıiz» órnegi qorshaǵan ortamen úılesim tapqan, ómirge talpynǵan, qunarlylyq pen molshylyqty beıneleıdi. Er adamnyń kostıýmindegi negizi element – qalqan erlik pen batyrlyqtyń sımvoly. Eki kostıýmniń de astary tereń. Basty tús bolyp qara jáne «jeńimpazdardyń túsi» sanalatyn altyn tús tańdaldy. Qara sý jolbarysynyń jyly da esepke alyndy. Óıtkeni, Olımpıadanyń bastalýy tap osy jyldyń enýimen sáıkes kelip otyr.
Qazaqstandyq atletter kostıýmniń tolyq kóńilden shyǵatynyn kıimdi ólshegen sátten-aq aıtyp keledi. Eske salaıyq, Abzal Ájiǵalıev ekinshi Olımpıada qatarynan elimizdiń tý ustaýshysy atanyp otyr.
«Bizdiń kostıýmderimiz biregeı ári rasymen de myqty energetıka seziledi. Mundaı mańyzdy sát Ekaterına ekeýmizge senip tapsyrylǵanyna qýanyshtymyn. El namysyn Olımpıadada qorǵaý úlken abyroı, al týyńdy alyp shyǵý arqyly jaýapkershilik odan ári arta túsedi. Bul sezimdi jetkizý múmkin emes!», - deıdi Abzal Ájiǵalıev.
Eskızden bastap sońǵy syrýǵa deıingi protsess úsh aıǵa sozyldy. Bul óner týyndysyn daıyndaýǵa 20-dan asa sheber jumyldyryldy, onyń ishinde 2 konstrýktor, 4 tiginshi, sýretshi jáne 8 kesteshi bar. Kıimdi bezendirip turǵan barlyq keste altyn, kúmis jiptermen jáne monshaqtarmen qoldan jasaldy.
«Kostıýmderdiń eskızi Olımpıadanyń ashylý saltanatyna deıin qupııa ústaldy. Sondyqtan, kostıýmniń qandaı bolatyny men úshin erekshe qyzyq edi. Kostıýmniń keremet shyǵatynyna kúmánim bolǵan joq. Alaıda, bul kostıým men oılaǵannan da artyq daıyndalypty! UOK pen osy bir sulýlyqty qoldan jasaǵan barlyq sheberlerge úlken alǵysymdy bildiremin. Barlyq jan-dúnıesin salyp istegen dúnıe ekeni sezilip tur. Qazaqstandy osyndaı deńgeıde tanytý úshin budan asqan ne oılap tabý kerektigin bilmeımin», – dedi Ekaterına Aıdova.
Aıta ketelik, Olımpıada oıyndarynda sporttyń 8 túrinen 34 sportshy baq synaıdy.
Qazir Aq Olımpıadanyń ashylý rásimi bastalyp ketti.
