«Tý - qoljaýlyq, Ánuran - oıynshyq emes» - respýblıkalyq basylymdarǵa sholý
***
Keshe Aqtaýdaǵy Jańaózen qalasynda oryn alǵan oqıǵalarǵa baılanysty bastalan sot otyrysy tórtinshi kúnge ulasty. Osy iske baılanysty materıal «Egemen Qazaqstan» gazetinde «Jábirlenýshiler adamgershilik tanytty» degen taqyryppen basyldy. «Jalpy osy juma kúngi otyrysta kim-kimniń de kóńiline jylylyq uıalatatyndaı sátterge kýá boldyq. Olaı deıtinimiz, sot otyrysynda sóz berilgen jábirlenýshiler Amanjanov, Kúntýov, Aıtpaeva, Jalmaǵanbetovalar, ózderi qanshama shyǵynǵa ushyrap, zııan shekse de sotqa bergen talap-aryzdaryn túgeldeı qaıtyp alatyndaryn aıtty. Azamattardyń qınalmaýyna, eldiń tynysh bolýyna múddeli ekendikterin bildirdi", - dep jazady basylym.
Taıaýda Kýveıtke ótken nysana kózdeýden ótken halyqaralyq týrnırde ánuranymyzdyń abyroıy aırandaı tógilgen bolatyn. Osy keleńsiz jaıtqa keńinen toqtalǵan «Egemen Qazaqstan» gazeti «Tý - qoljaýlyq, Ánuran - oıynshyq emes» degen taqyryppen maqala jarııalady. «Taqyr jerden súrinetin mundaılarǵa qalaı qarnyń ashyp, qalaısha qanyń qaınamaıdy?! Ótirik bolsa ózderińiz aıtyńyzdar, shaınap bergen nandy durystap juta almaıtyn shalaǵaı sheneýnikterdiń nemquraıdylyǵy men salǵyrttyǵynan aınaldyrǵan bes aıdyń ishinde áp-ádemi Ánuranymyz álem chempıonatynda, elishilik festıvalda jáne halyqaralyq týrnırde, ıaǵnı úsh ret shatastyrylyp, mysyqtileý keıbireýlerdiń mysaly men mysqylyna aınaldy», - dep ashyna jazady basylym.
«Alash aınasy» gazetiniń dástúrli «Dat!» aıdarynda qobyzshy Saıan Aqmoldamen aradaǵy suhbat «Kúıdi notamen shyǵarýǵa qarsymyn» degen taqyryppen berilgen. Basylym tilshisiniń barlyq saýaldaryna tuşymdy jaýap bergen ol: «Dástúrli ónerimizdiń kenje qalyp, týynyń jyǵylǵany bárimizge aıan. Dástúrli mýzykamyzdy qoldaý, dáripteý óte tómen deńgeıde. Qazir estradan basqa túk estimeıtin boldyq. Teledıdardy qossań da, qandaı mereke bolsa da - solar. Biraq jandy daýypen aıtyp jatqan eshqaısysy joq. áıteýir, aýyzdaryn jybyrlatyp turady. Kim kimdi aldan jatqanyn túsinbeısiń», - deıdi.
Osy basylym turaqty «Oı-kókpar» aıdarynda japon elindegideı bastyqtyń maketin sabaý dástúrin tájirıbege engizý kerek pe degen saýaldy mamandar talqysyna usynyp otyr. Shyndyǵynda da qoǵamda qazirgi ýaqytta «depressııadamyn» dep júrgender ekiniń biri desek, artyq aıpaǵandyq bolar. Kóbin sharshatatyn jumystyń shamadan tys mólsheri men eńbekaqynyń soǵan saı tólenbeýi bolsa kerek. Mundaıda kópshilik, árıne basshyny kinálaıdy. Osy rette japondardyń adam boıyndaǵy jaǵymsyz energııany, qyjyl men kekti ketirý úshin oılap tapqan bastyq maketin sabaý tájirıbesin elimizde engizýge mamandar kózqarasy qandaı eken? Bilgińiz kelse, basylymnyń búgingi nómirin qarańyz.
***
«Batysta byltyrǵy sý tasqyny qaıtalanýy múmkin». «Aıqyn» gazetinde osy taqyryppen jaryq kórgen maqalada bul kúnderi Jaıyq ózenindegi ahýal qaýip tóndirip otyrǵandyǵy jaıynda jazylǵan. Basylymnyń atap ótýinshe, oǵan Shaǵan, Derkúl ózenderindegi sý deńgeıiniń joǵary, al Úlken jáne Kishi ózendegi sý kóleminiń normadan 30-80 paıyzǵa artyp ketýi sebep bolyp otyr.
***
«Qazaqstandyq fermerler elde jańa Agrarlyq partııa qurýdy usynady», - dep jazady «Vremıa» gazeti senbilik sanyndaǵy «Spasıte mestnyh telok» degen taqyryptaǵy maqalasynda. Basylymnyń atap ótýinshe, olar aýyl sharýashylyǵy mınıstrliginiń basshylyǵy sharýalardyń problemalaryn sheshe almaı otyr dep sanaıdy eken. Al keshegi Fermerler odaǵynyń respýblıkalyq keńesi atalǵan vedomstvonyń sharýalarǵa muryn shúıire qaraıtyndyǵyn kórsetken.
***
Stýdentterdiń táýelsiz kásipodaǵy Almatydaǵy paraqorlyq barynsha boı aldyrǵan joǵary oqý oryndarynyń tizimin jasap shyǵypty. Bul jaıynda «Ekspress K» basylymyndaǵy «A výz ı nyne tam» degen taqyryptaǵy maqalada keńinen baıandalǵan. Sonymen atalǵan reıtınge sáıkes, Almatydaǵy eń paraqorlyq jaılaǵan oqý oryndary qatarynda Asfendııarov atyndaǵy medıtsınalyq ýnıversıtet, Orta Azııalyq ýnıversıtet, Qonaev atyndaǵy ınstıtýt, «Turan» ýnıversıteti bar. Atalǵan jastar uıymynyń kóshbasshysy Rınat Ibraev barlyq paraqor ustazdardyń aty-jónderin de jaqsy biletindigin málim etip otyr. Sonymne qatar ol synaqtar men emtıhandardyń myń teńgeden bes myńǵa deıin, al barlyq sessııany jabý 15 myńnan 30 myńǵa deıin baǵalanatyndyǵyn málim etken.
