Tý-154 ushaǵyn basyp alýshy V.Pýtınge Sheshenstan týraly mańyzdy málimetter bermek bolǵan
ASTANA. Shildeniń 30-y. QazAqparat - Keshe máskeýlik Domodedovo áýejaıynda Tý-154 ushaǵyn basyp alǵan er azamat RF úkimet basshysy Vladımır Pýtınge «Sheshenstan týraly mańyzdy qujatty» bermek bolypty. Bul týraly RBK agenttigine Máskeý aımaqaralyq kólik prokýrorynyń kómekshisi Rýfına Nevzorova habarlady.
Onyń aıtýynsha, jolaýshylar ushaǵyn basyp alǵan álgi azamat V.Pýtınmen kezdesýdi talap etip, qolynda premerge tabys etetin «Sheshenstan Respýblıkasy týraly mańyzdy qujattar» bar ekenin málim etken.
105 adamdy kepildikke alǵan álgi qaskóıdiń tulǵasy anyqtaldy. Ol Krasnodar ólkesiniń týmasy, 1970 jyly týǵan Magomed Pokıev degen azamat bolyp shyqty.
Esterińizge sala keteıik, keshe Mıneralnye Vody qalasynan Máskeýge ushyp kelgen Tý-154 ushaǵyn basyp alý áreketi oryn alǵan bolatyn. M.Pokıevten ashyq qoqan-loqy aıtylmaǵan, biraq ol tártip saqshylaryna asyǵys áreketter jasamaýdy eskertken.
Kenetten jolaýshylardyń biriniń jaǵdaıy nasharlap, oǵan kómek kórsetý úshin ushaq bortyna dáriger bolyp kóterilgen eki tártip saqshysy qaskóıdi ustap, adamdardy bosatty. Oqıǵa saldarynan eshkim zardap shekken joq. Tekserý kezinde odan eshqandaı qarý tabylmaǵan. Qazir qylmystyq is qozǵaý máselesi sheshilip jatyr.
