Tszılın qalasynyń turǵyny saıabaqta 4 amerıkalyq azamatty pyshaqtap tastady
ASTANA. KAZINFORM – Sıngapýrdyń 8world News aqparat agenttiginiń habarlaýynsha, qylmystyq oqıǵa 10 maýsymda bolǵan. Tszılın qalasyndaǵy jergilikti «Beıhýa ýnıversıtetinde» akademııalyq saparǵa kelgen 4 amerıkalyq azamat pyshaq jaraqatymen aýrýhanaǵa túsken.
Jaralanǵan tórt adamnyń Aıova shtatyndaǵy Kornell kolledjiniń oqytýshylary ekeni belgili boldy. Olar saıabaqtaǵy ǵıbadathanaǵa barǵan. Sol kezde tórteýine pyshaq ustaǵan qytaılyq azamat shabýyl jasaǵan.
Ázirge onyń qandaı maqsatpen qylmystyq iske barǵany belgisiz.
Shabýyldan keıin X áleýmettik platformasynda birneshe adamnyń jaraqat alyp, qansyrap, jerde jatqan vıdeosy tarady.
Degenmen, qytaılyq áleýmettik jelilerde tıisti fotosýretterdi tabý múmkin emes. Qytaı bıligi de bul oqıǵaǵa qatysty málimdeme jasaǵan joq. Jergilikti BAQ-ta da atalǵan oqıǵaǵa qatysty aqparattar jarııalanbady.
