Tsýnamı qaýpi bar: Indonezııa jaǵalaýynda magnıtýdasy 7,7 bolatyn jer silkinisi boldy
ASTANA. KAZINFORM — Indonezııa jaǵalaýynda magnıtýdasy 7,7 bolatyn qýatty jer silkinisi tirkeldi. Bul týraly AQSh Geologııalyq qyzmeti (USGS) habarlady, dep jazady Associated Press.
Jer silkinisi senbi kúni jergilikti ýaqyt boıynsha tańǵy saǵat 5:58–de Flores aımaǵynda, 10 shaqyrym tereńdikte bolǵan. Zilzalanyń oshaǵy Shyǵys Nýsa-Tengara provıntsııasyndaǵy Ende qalasynan soltústik-soltústik-batysqa qaraı 68 shaqyrym jerde ornalasqan.
Qazir zardap shekkender men qıraǵan nysandar týraly aqparat joq.
Indonezııanyń Meteorologııa, klımatologııa jáne geofızıka agenttigi tsýnamı qaýpine baılanysty eskertý jarııalap, turǵyndardy jaǵajaılar men ózen jaǵalaýlarynan aýlaq bolýǵa shaqyrdy. Agenttiktiń málimetinshe, Flores araly mańynda taıaz sýda jer silkinisi bolǵan.
Qaýipti aımaqtaǵy jaǵalaý turǵyndaryna bılik sý deńgeıin baqylap otyrǵan kezde bıik jerlerge kóterilý usynyldy.
17 myńnan astam araldan turatyn Indonezııa «Tynyq muhıtyndaǵy otty beldeý» aımaǵynda ornalasqan. Sondyqtan elde jer silkinisi men janartaýlardyń belsendiligi jıi baıqalady.
Eske salaıyq, buǵan deıin Kashmırde jer silkindi.
Al Kolýmbııadaǵy jer silkinisinen keıin 281 adam qaza tapty.
