Tımýr Súleımenov bıylǵy teńge baǵamy týraly: Qajet bolsa, ınterventsııa jasaýǵa daıynbyz
ASTANA. KAZINFORM – Ulttyq bank tóraǵasy Tımýr Súleımenov Úkimettiń keńeıtilgen otyrysynda 2026 jyly teńge baǵamyn turaqtandyrý úshin ne isteýge bolatynyn aıtty.
- Bıyl biz jumsaq teńge baǵamyn qalyptastyrýdyń ıkemdi rejımin saqtaımyz. Bul – bizdiń syrtqy shoktarǵa qarsy tabıǵı turaqtandyrýshymyz. Deı turǵanmen, qajet bolǵan jaǵdaıda valıýtalyq ınterventsııa sııaqty sheshimtal sharalar qabyldaýǵa daıynbyz. Altyn-valıýta qorymyz oǵan múmkindik beredi, - dedi Tımýr Súleımenov.
Onyń sózinshe, syrtqy naryqtardaǵy qubylmalylyq pen valıýtaǵa degen suranysqa qaramastan, teńge baǵamy jyl qorytyndysy boıynsha 3,7 protsentke nyǵaıdy. Buǵan Ulttyq bank júrgizgen aqsha-nesıe saıasaty jáne memlekettiń jalpy markoekonomıkalyq saıasatyna degen senimniń artýy aıtarlyqtaı yqpal etse kerek.
- Eldiń tólem balansyna kelsek, saýda profıtsıtiniń qysqarýy baıqalýda. Bul jalpy tólem balansyna qysym kórsetip otyr. Tólem balansyn jaqsartý úshin daıyn taýarlar eksportyn arttyra otyryp, belsendi saýda saıasatyn júrgizý kerek jáne qazaqstandyq taýarlar úlesin ósirip, ımport almastyrýdy kúsheıtý qajet dep sanaımyz. Logıstıkalyq ınfraqurylym men kedendik basqarýdy jetildirý de mańyzdy, - dedi Ulttyq bank basshysy.
Aıta keteıik, búgin Memleket basshysy Qasym-Jomart Toqaevtyń tóraǵalyǵymen Úkimettiń keńeıtilgen otyrysy ótip jatyr.
Jıynda eldiń 2025 jylǵy áleýmettik-ekonomıkalyq damýy qorytyndylanyp, Úkimettiń aldaǵy kezeńge arnalǵan negizgi mindetteri aıqyndalady.
