Tsýkerberg sońǵy eki jylda alǵash ret Meta aktsııalaryn satty

Mark Tsýkerberg Meta Platfroms Inc. kompanııasynyń aktsııalaryn baǵa belgileý ósken 2021 jyldyń qarashasynan beri alǵash ret satty, delingen Qundy qaǵazdar men bırja komıssııasy (SEC) usynǵan qujatta. Kazinform bul týraly INTERFAX-qa silteme jasap habarlaıdy.

Qarashada Tsýkerbergpen baılanysy bar túrli uıymdar Meta-nyń 682 myńǵa jýyq aktsııasyn 185 mln dollarǵa satqan.

Meta-nyń naryqtaǵy baǵasy jyl basynan qarashanyń aıaǵyna deıingi aralyqta Nvidia Corp. kompanııasyn qospaǵandaǵy AQSh-tyń iri IT-kompanııalarynyń ishinde rekordtyq qarqynmen – 172%-ke deıin kóterildi. Aktsııalardyń baǵasy 2021 jyly tirkelgen tarıhı eń joǵary kórsetkishke jaqyndap qaldy.

Tsýkerberg burynǵysha Meta-nyń 13%-ne ıelik etedi. Onyń baılyǵy 117,7 mlrd dollar dep baǵalanyp otyr.

Kásipker men onyń jary Prıstsılla Chan buǵan deıin qarjysynyń 99%-in qaıyrymdylyqqa jumsaýǵa ýáde bergen bolatyn. Olar negizin qalaǵan qaıyrymdylyq qorlary teńdik, aýrýlarmen kúres, bıomedıtsına, qoljetimdi baspana jáne basqa da bastamalardy qoldaýmen aınalysady.