Tsýkerberg Meta kompanııasynyń árbir onynshy qyzmetkerin jumystan shyǵarady
ASTANA. KAZINFORM — Meta-nyń árbir onynshy qyzmetkeri jumysynan aıyrylady. Bul týraly kompanııanyń kadrlar jónindegi dırektory Djanell Geıldiń hatynda aıtylǵan, dep habarlaıdy Bild.
Jospar boıynsha 8 myń qyzmetkerdi jumystan shyǵarý jáne áli toltyrylmaǵan 6000 bos oryndy qysqartý khzdelgen. Qysqartýlardyń basty sebepteriniń biri — jasandy ıntellektini keńinen engizý.
Sońǵy jyldary Meta sııaqty tsıfrlyq transformatsııany júıeli túrde ilgeriletken ınternet-kompanııalar az. Kompanııa basshysy Mark Tsýkerberg jasandy ıntellektini barlyq protsesterge engizdi. Tsıfrlyq damý baǵytyndaǵy ınvestıtsııalar — orasan zor. Tek bıyldyń ózinde kompanııa 135 mıllıard AQSh dollaryn jumsaýdy josparlap otyr.
Alaıda jasandy ıntellekt júıeleri kúsheıgen saıyn, adam eńbegine qajettilik azaıyp jatyr. Tsýkerberg bıyl qańtar aıynda jasandy ıntellektige baılanysty qysqartýlar bolatynyn meńzegen.
— Buryn úlken komandalar qajet bolǵan jobalardy búginde bir ǵana óte talantty «adam» oryndaı alady, — degen edi ol.
Kompanııa bul qysqartýlardy Meta-ny «tıimdirek etý jáne ınvestıtsııalardy teńgerimdeý» qajettiligimen túsindiredi.
Kompanııanyń málimetinshe, 2025 jyldyń jeltoqsan aıynyń sońynda onda 78 865 adam jumys istegen. Bolashaqta kompanııa jasandy ıntellektige mamandanǵan shaǵyn komandalar arqyly kóbirek nátıje alýdy kózdep otyr.
Meta qyzmetkerleri mundaı jaǵymsyz jańalyqtarǵa úırenip qalǵan. 2022 jyldyń sońynda kompanııa 11 myń jumys ornyn qysqartqan bolatyn. 2023 jyldyń naýryz aıynda taǵy 10 myń adam jumystan bosatyldy. Alaıda keıin Tsýkerberg qaıtadan qyzmetkerlerdi jumysqa ala bastady. 2023-2025 jyldar aralyǵynda qyzmetkerler sany 11 myńnan astam adamǵa artty.
Endi jasandy ıntellekt tehnologııalyq alyptardyń kadrlyq saıasatyn túbegeıli ózgertýi múmkin. Bul úrdiske Microsoft kompanııasynyń jaqynda qabyldaǵan sheshimi de saı keledi. Kompanııa alǵash ret ótemaqy baǵdarlamasyn iske qosyp, sonyń kómegimen shamamen 9 myń qyzmetkerdiń jumystan ketýin yntalandyrmaq.
Eske sala keteıik, byltyr Amazon 30 myń qyzmetkerin qysqartatyny týraly habarlaǵan bolatyn.
