Tsýkerberg Meta kompanııasyn basqaratyn jasandy ıntellekt botyn jasap jatyr

ASTANA. KAZINFORM — Meta kompanııasynyń basshysy Mark Tsýkerberg basqarý mindetteriniń bir bóligin óz moınyna ala alatyn jasandy ıntellekt júıesin qurmaqshy, dep jazdy Euronews.

Jasandy ıntellekt agenti paıdalanýshy atynan tapsyrmalardy az adam aralasýymen josparlap, oryndaýǵa qabiletti bolady — aqparat izdeýden bastap demalysty uıymdastyrýǵa deıin kómektesýi múmkin.

Tsýkerberg osyndaı agentti kúndelikti tapsyrmalardy jyldam oryndaý úshin damytyp jatyr. The Wall Street Journal (WSJ) málimeti boıynsha, bul bot tehnologııalyq mıllıarderge qajetti aqparatty jyldam alýǵa múmkindik beredi, esepterdi qarap shyǵý nemese kompanııanyń basqarý júıesin tartý qajet bolmaıdy.

Bul joba Meta qyzmetkerleriniń barlyq jumys protsesterine jasandy ıntellekt engizý strategııasyna sáıkes keledi, dep jazady WSJ. Bul kompanııaǵa uıymdyq qurylym deńgeılerin azaıtýǵa jáne jasandy ıntellektti engizý boıynsha básekelestik qabiletin saqtap qalýǵa kómektesedi.

— Biz jeke mamandardyń rólin kúsheıtip, komandalardy «tik emes», ıaǵnı qarapaıym etýge tyrysamyz. Eger bul sátti shyqsa, meniń oıymsha, biz áldeqaıda kóp nársege qol jetkize alamyz, ári jumys áldeqaıda qyzyqtyraq bolady, — dedi Tsýkerberg kompanııanyń toqsandyq esebin talqylaý kezinde.

Sonymen qatar, buǵan deıin habarlanǵandaı, Gonkong álemdegi alǵashqy ashyq kodty adam men jasandy ıntellekt agentteriniń birlesken jumys jelisin iske qosýǵa daıyndalyp jatyr. Joba neırojúıelerdi kúndelikti ómirge engizý kezinde qatań basqarý standarttaryn ornatýǵa baǵyttalǵan.

Buǵan deıin Meta kompanııasynyń negizin qalaýshy Mark Tsýkerberg pen onyń jubaıy Prıstsılla Chan Florıda shtatyndaǵy Indıan Krık jasandy aralynan 170 mıllıon dollarǵa záýlim úı satyp alǵan edi.