Ortalyq barlaý basqarmasynyń dırektory Gavanada Kýba bıligi ókilderimen kezdesti
ASTANA. KAZINFORM — Ortalyq barlaý basqarmasynyń dırektory Djon Retklıff beısenbi kúni Gavanada Kýba bıliginiń ókilderimen kezdesti. Bul týraly Kazinform agenttiginiń Vashıngtondaǵy menshikti tilshisi NBC News-ke silteme jasap habarlady.
Retklıff Kýbanyń ishki ister mınıstrimen, barlaý qyzmetiniń basshylarymen jáne burynǵy prezıdent Raýl Kastronyń nemeresi, memlekettik qyzmetker Raýlıo Rodrıges Kastromen kelissóz júrgizdi.
OBB basshysy Kýbaǵa AQSh prezıdenti Donald Tramptyń joldaýyn jeke jetkizý úshin barǵan. Aq úıdiń málimetinshe, AQSh Kýbamen ekonomıka jáne qaýipsizdik salalarynda baıypty yntymaqtastyq ornatýǵa daıyn. Alaıda bul úshin Kýba túbegeıli ózgerister jasaýy qajet.
Kezdesý barysynda taraptar barlaý salasyndaǵy yntymaqtastyqty, ekonomıkalyq turaqtylyq máselelerin jáne qaýipsizdik taqyryptaryn talqylady. Sonymen qatar AQSh tarapy Kýba endi Batys jarty sharyndaǵy qarsylastarǵa pana bolmaýy tıis ekenin atap ótti.
Óz kezeginde Kýba bıligi AQSh-tyń ulttyq qaýipsizdigine qaýip tóndirmeıtinin dáleldeıtin aqparat usynǵanyn málimdedi. Sondaı-aq Gavana ózin terrorızmdi qoldaıtyn memleketter tizimine engizýge eshqandaı zańdy negiz joq ekenin jetkizdi.
Eske salsaq, Djo Baıden ákimshiligi Kýbany AQSh-tyń terrorızmdi demeýshi memleketter tiziminen alyp tastaǵan bolatyn. Alaıda Donald Tramp ekinshi prezıdenttik merziminiń alǵashqy kúninde bul sheshimdi qaıta ózgertip, Kýbany atalǵan tizimge qaıta engizdi.
Buǵan deıin Kýba áskeri AQSh tarapynan bolýy múmkin agressııaǵa daıyndalyp jatqany habarlanǵan edi.
