Tis emdetken 3 jasar qyzdyń ólimi: sot anestezıologke úkim shyǵardy
ASTANA. KAZINFORM — Astanada jeke stomatologııa klınıkasynda 18 tisin emdeý kezinde kóz jumǵan úsh jasar qyzdyń ólimine qatysty sot protsesi aıaqtaldy.
Jarııalanǵan úkimge sáıkes, anestezıolog Qylmystyq kodekstiń 317-babynyń 3-bóliginde kózdelgen aıyp boıynsha kináli dep tanylyp, úsh jyl merzimge medıtsınalyq qyzmet kórsetýge baılanysty jumysty atqarý quqyǵynan aıyryldy, sondaı-aq eki jylǵa bas bostandyǵynan aıyrý jazasy berildi.
Qazaqstan Respýblıkasy Konstıtýtsııasynyń 30 jyldyǵyna baılanysty «Raqymshylyq týraly» Zańynyń 2-babynyń 1-tarmaǵyna sáıkes, ol negizgi jazasyn óteýden bosatyldy.
Bul rette, dáriger jazasyn kolonııada ótemeıdi, biraq úsh jylǵa medıtsına salasynda qyzmet etý quqyǵynan aıyrylady.
Anestezıolog Qylmystyq kodekstiń 317-babynyń (Medıtsına nemese farmatsevtıka qyzmetkeriniń kásiptik mindetterin tıisinshe oryndamaýy) 3-bóliginde qarastyrylǵan abaısyzda adam ólimine alyp kelgen is-áreketter boıynsha aıyptaldy.
Sot otyrysy barysynda aıyptalýshy taǵylǵan aıyptaýlarmen kelispeıtinin aıtty. Sonymen qatar ol balanyń aýrýyna qatysty habarsyz bolǵanyn málimdedi.
Eske salsaq, bul qaıǵyly jaǵdaı 2024 jyldyń 30 qazanynda boldy. Úsh jasar qyz tisin emdeý kezinde narkozdan oıanbaı qalǵan.
Aıta keteıik, 2025 jylǵy 23 maýsymda Prezıdent raqymshylyq týraly zańǵa qol qoıdy.
Buǵan deıin Parlament Májilisinde raqymshylyq jasaý týraly zań jobasyn talqylaý kezinde bosatylatyn adamdardyń sany belgili boldy.