Tisimen sýret salatyn túrkistandyq qyz eldi tańǵaldyrdy

ASTANA. KAZINFORM — Túrkistanda qylqalamdy tisimen ustap, sýret salatyn erekshe qyz bar. 16 jastaǵy Rýsalına Qurmanovanyń qol-aıaǵy týǵannan ıkemge kelmeıdi. Biraq soǵan qaramastan, boıjetken tabıǵattyń ásem kórinisterin salýǵa áýes.

4 jasynda ata-ana qamqorlyǵynsyz qalǵan Rýsalına álemdi sur túste kórýdi qalamapty. Ol kishkentaıynan sýret arqyly oı-pikirin jetkizýge qalyptasqan.

— Aıtqym kelgenniń bárin sýret arqyly jetkizgim keledi. Túrli-tústi boıaý meni shabyttandyrady. Tabıǵattyń ásem kórinisterin salý — sheksiz álemmen baılanys, — dedi jas sýretshi Jibek Joly telearnasynyń «Búgin Live» baǵdarlamasyna bergen suhbatynda.

Rýsalına Pavlodarda dúnıege kelip, taǵdyrdyń jazýymen Túrkistanǵa turaqtaǵan. «Shuǵyla» arnaýly áleýmettik qyzmetter kórsetý ortalyǵynyń ádiskeri Janar Tájenova onyń sýret salýdy 6 jasynan bastaǵanyn aıtady. Sondaı-aq boıjetken ádebıetke ǵashyq, kitap oqýǵa jáne án aıtýǵa yntyq.

— Túrkistan qalasynda ótken «Jas talant» baıqaýynda 2 jyl qatarynan júldeli boldyq. Aqyn Satybaldy Tileýovtyń 140 jyldyǵyna arnalǵan festıvalda da bas júldeni jeńip aldyq. Qylqalam sheberleri jınalatyn sharalarda da marapatsyz qalmadyq. Rýsalınanyń jetistikteri óte kóp, — dedi ádisker.

Rýsalınanyń kóptegen sýretteri kórmelerde satylymǵa shyqqan.

— Ónersúıer qaýym onyń eńbekterin baǵalap jatyr. Satylymy da jaqsy. Jınalǵan qarajatqa qajetti zattaryn aldy, — dedi Janar Tájenova.

Buǵan deıin teńiz jaıaý áskeriniń matrosy qazaq batyrlarynyń sýretin salyp júrgenin jazǵan edik.