Tsıntsınnatı týrnıri: 20 eıs jasaǵan Rybakına jeńilip qaldy

ASTANA. KAZINFORM — Qazaqstannyń birinshi, álemniń 4-raketkasy Elena Rybakına Tsıntsınnatı (AQSh) WTA 1000 týrnıriniń úshinshi aınalymyna shyǵa almady.

Jarysty ekinshi aınalymnan bastaǵan qazaqstandyq tennısshi álemniń 27-raketkasy, kanadalyq, 2021 jylǵy AQSh ashyq chempıonatynyń fınalısi Leıla Fernandespen kezdesti.

Bul E.Rybakınanyń densaýlyǵyna baılanysty Parıj Olımpıadasynda qatysýdan bas tartqannan keıingi alǵashqy oıyny edi.

Match breık almasýmen bastaldy. Esep 4:3 bolǵan mezette breık jasaǵan Rybakına sol basymdylyǵynan aıyrylǵan joq – 6:3.

Ekinshi sette taı-breıkte Fernandes sátti óner kórsetti – 7:6 (7:3).

Úshinshi, sheshýshi partııada esep 3:3 bolǵan mezette Fernandes breık jasap ketti. Aqyry matchty jeńispen túıindedi – 6:4.

Eki saǵat 35 mınýtqa sozylǵan tartysty báseke barysynda Rybakına 20 eıs jasap, 7 breık-poınttyń altaýyn paıdalandy. Kanadalyq sportshy 5 eıs, 6 breıkpen (17 breık-poınt) kózge tústi. 

L.Fernandes shırek fınalǵa shyǵý úshin álemniń 20-raketkasy, reseılik Dıana Shnaıdermen talasady.

E.Rybakına ótken jyly Tsıntsınnatıda úshinshi aınalymnan asa almaǵan edi.

Eske sala keteıik, budan buryn Qulambaevanyń Serbııada qarsylasyn aıqyn basymdylyqpen jeńip, shırek fınalǵa shyqqanyn jazǵan bolatynbyz.