Tsınmın merekesi: Qytaı temirjolynda 90 mln-nan asa sapar josparlanǵan
ASTANA. KAZINFORM — Qytaıda kele jatqan dástúrli Tsınmın merekesi qarsańynda juma kúni búkil Qytaı temirjol júıesiniń erekshe jumys kezeńi bastaldy, dep habarlaıdy Sınhýa.
Bul kezeń kelesi seısenbige deıin jalǵasady. Osy ýaqyt ishinde eldegi temirjoldardaǵy jolaýshylar aǵyny 90,5 mıllıon adamǵa jetýi múmkin, dep boljaıdy Qytaı memlekettik temirjol korporatsııasy.
Atalǵan kezeńde elde táýligine orta eseppen 18,1 mıllıon temirjol sapary júzege asyrylýy kútiledi, al jolaýshylardyń eń kóp shoǵyrlanýy senbi kúni bolyp, bir táýlikte 21,2 mıllıon saparǵa jetedi dep boljanǵan.
Temirjol operatorlarynyń málimetinshe, bıyl Tsınmın merekesi kezinde (4–6 sáýir) týysqandardy kórip, ata-babalardy eske alý, kóktemgi serýender men saıahat jasaý maqsatynda saparǵa suranys joǵary bolyp otyr. Eń kóp jolaýshylar ortasha jáne qysqa qashyqtyqqa saparǵa shyǵady. Sonymen qatar týrıstik saparlardyń sany aıtarlyqtaı artqan.
Tsınmın merekesi, ıaǵnı qaıtys bolǵandardy eske alý kúni, bıyl 5 sáýirge sáıkes keledi. Bul Qytaıdaǵy dástúrli mereke, adamdar qaıtys bolǵandardy eske alyp, ata-babalaryna qurmet kórsetedi. Merekelik demalys kúnderi adamdarǵa jumystan jáne oqýdan azdap demalyp, belsendi demalysqa jáne kórikti jerlerge barýǵa múmkindik beredi.
Osyǵan deıin Qytaı áýe kompanııalary ishki reısterde otyn salyǵyn kóbeıtetini habarlandy.
