Tsıfrlyq jol qaǵazy: Astanada arnaıy tehnıkanyń jumysyn endi onlaın baqylaýǵa bolady
ASTANA. KAZINFORM — Elorda «Astana Tazalyq» mekemesine qarasty 393 tehnıkaǵa jańa júıe ornatyldy. Bul júıe naqty ýaqyt rejıminde ár arnaıy tehnıka qaı jerde jumys istep jatqanyn, onyń marshrýtyn, qansha reagent sepkenin kórsetedi.
Elordada «Astana Tazalyq» kásipornynyń qysqa daıyndyǵy tanystyryldy. Іs-shara barysynda kompanııa kópshilikke óziniń tsıfrlyq jańalyqtaryn pash etti. «Tsıfrlyq jol qaǵazy» — endi Astana kóshelerine shyqqan ár tehnıka qandaı baǵytta júr, qandaı kólemde reagent shashty, qaı ýaqytta jumys bastady — bárin naqty ýaqyt rejıminde kórsetetin bolady.
Qalyń qarymen, qatty jelimen erekshelenetin saryarqa qysy jyl saıyn jol jáne kommýnaldyq qyzmet úshin úlken synaqqa aınalady. Osyny eskere otyryp, kásiporyn basshylyǵy aldaǵy maýsymda jumystyń turaqty ári úzdiksiz júrýi úshin qabyldanǵan barlyq sharalardy egjeı-tegjeıli kórsetti.
Mekemeniń bas dırektory Zamır Sagınov qala tazalyǵy jolynda kún saıyn eńbek etip júrgen mamandardyń rólin aıryqsha atap ótti.
— Dál osy jumysshylar tańmen talasa lınııaǵa shyǵyp, kóshelerdiń taza ári qaýipsiz bolýyn qamtamasyz etedi. Olardyń eńbegi — elordanyń jaıly ómiriniń negizi, — dedi ol.
Sonymen qatar shara barysynda kásiporynnyń negizgi tsıfrlyq sheshimderi tanystyryldy. Onyń ortalyq elementi — elektrondyq jol paraǵy júıesi. Bul júıe naqty ýaqyt rejıminde qaı arnaıy tehnıka qaı jerde jumys istep jatqanyn, onyń júrip ótken marshrýtyn, qansha reagent sebilgenin jáne jumystyń qaı ýaqytta bastalǵanyn kórsetedi. Bul tek baqylaý quraly ǵana emes, kommýnaldyq qyzmettiń ashyqtyǵyn arttyratyn, jumystyń tıimdiligin birneshe ese kúsheıtetin jańashyldyq. Bul sheshim qazirgi ýaqytta qalanyń 393 arnaıy tehnıkasyna engizilip, eseptilikti avtomattandyrý, JJM shyǵysynyń ashyqtyǵy jáne tıimdi marshrýttyq josparlaý boıynsha joǵary nátıjeler kórsetip keledi.
Elektrondy jol paraǵy júıesine qyzyǵýshylyq elorda sheńberinen áldeqashan asyp tústi. Qazirgi tańda bul jobaǵa Almaty qalasynyń ákimdigi nazar aýdaryp, ony engizý boıynsha satyp alý rásimderin bastap ketti.
Sonymen qatar «Astana Tazalyq» Shymkent qalasynyń, sondaı-aq Pavlodar jáne Qyzylorda oblystarynyń ákimdikterimen kelissóz júrgizip jatyr. Astananyń ózinde atalǵan tehnologııa «Astana-Teplotranzıt» AQ kólik quraldarynda engizedi. Júıe jeke kompanııalardyń da aıtarlyqtaı qyzyǵýshylyǵyn týdyryp, kommýnaldyq saladaǵy tsıfrlyq sheshimderge degen suranystyń artqanyn kórsetip otyr.
Tsıfrlandyrý protsesi qyzmetkerlerdiń qaýipsizdigi men densaýlyǵy salasyn da qamtydy.
— Jumys barysyndaǵy táýekelderdi azaıtý maqsatynda «Med365» jáne «Adal Check» júıeleri engizildi. Bul platformalar qyzmetkerlerdiń kúndelikti medıtsınalyq tekserýden ótýin onlaın formatta tirkep, mashınıster men júrgizýshilerdiń jumysqa ruqsat alý tártibin naqty baqylaıdy. Nátıjesinde tótenshe jaǵdaılardyń aldyn alý múmkindigi artady, — dep atap ótti mekeme basshysy.
Kásiporyndaǵy taǵy bir zamanaýı jańalyq — kólikterge ornatylǵan júrgizýshiniń sharshaýyn baqylaý júıesi.
— Ol kabınanyń ishindegi barlyq buzýshylyqtardy tirkeıdi. Aıtalyq, júrgizýshi qaýipsizdik beldigin taqpasa, marshrýt aýystyrsa nemese uıyqtap ketse, júıe birden reaktsııa bildiredi. Bul apattardyń aldyn alyp, jol qaýipsizdigin qamtamasyz etýge eleýli úles qosady, — dedi Sagınov.
Budan buryn habarlanǵandaı, elordada jumysshy mamandyqtar baıqaýynda «Astana Tazalyq» kósh bastady.