Tsıfrlyq transformatsııa: Jumysqa ornalasý úshin áskerı bılet talap etilmeıdi

ASTANA. KAZINFORM – Jumysqa ornalasý nemese oqýǵa túsý kezinde endi zańdy tulǵalar áskerı bılet talap etpeıtin boldy. Bul týraly Sarbaz.kz. saıty jazdy. 

Qorǵanys mınıstrliginiń málimetinshe, áskerı qyzmet ótkerýge jatatyn adamdardy jáne merzimdi áskerı mindettilerdi áskerı esepke alý qaǵıdalarynyń 6-taraýyna sáıkes zańdy tulǵalar áskerı esepke alýdy júrgizýge mindetti.

«Zańdy tulǵalardyń áskerı esepke alýdy júrgizgen kezdegi negizgi mindetteriniń biri jumysqa (oqýǵa) qabyldanǵan azamattardyń áskerı esepke alý mártebesin anyqtaý bolyp sanalady.

Osyǵan baılanysty kadr bólimderi áskerı esepke alý qujattaryn (áskerı bılet, tirkeý týraly kýálik), áskerı qyzmet ótkergenin rastaıtyn anyqtamalardy jáne t.b.suratatyn.

Qarýly Kúshterdiń júrgizilip jatqan tsıfrlyq transformatsııasy bul talaptardy joıýǵa múmkindik berdi.

Jumysqa (oqýǵa) qabyldanǵan azamattardyń áskerı esepke alý mártebesin anyqtaý úshin endi jumys berýshige Qorǵanys mınıstrliginiń aqparattyq júıesinen áskerı esepke alý týraly aqparatty bir ret basý qajet», - delingen mınıstrlik habarlamasynda.

Qorǵanys mınıstrligi Eńbek jáne halyqty áleýmettik qorǵaý mınıstrligimen jáne Memlekettik qyzmet isteri agenttigimen birlese otyryp, zańdy tulǵalarǵa Áskerı esepke alýdy júrgizý qaǵıdalarynda kózdelgen qyzmetkerdiń jeke bıletterin toltyrý úshin qajetti áskerı esepke alý týraly aqparatty alýǵa múmkindik beretin biregeı qyzmetterdi iske qosty.

Bul sanatqa ESUTD AJ-de qyzmetkerlerdiń esebin júrgizetin úkimettik emes uıymdar da, E-Qyzmet AJ-de qyzmetkerlerdiń esebin júrgizetin memlekettik organdar da kiredi.

Qorǵanys mınıstrligi ortada azamat pen ol týraly aqparat bolatyn júıeni qurý boıynsha turaqty jumys júrgizip keledi.