Tsıfrlyq transformatsııa men jasandy ıntellekt ulttyq strategııaǵa biriktiriledi – Qarın
ASTANA. KAZINFORM – Bıylǵy Prezıdent Joldaýynyń biriktirýshi ıdeıasy – tsıfrlandyrýdy keń kólemde damytý jáne jasandy ıntellektini jappaı engizý. Bul týraly Memlekettik keńesshi Erlan Qarın óziniń áleýmettik jelidegi jazbasynda atap ótti.
— Bıylǵy Joldaýdyń biriktirýshi ıdeıasy — tsıfrlandyrýdy keń kólemde damytý jáne jasandy ıntellektini jappaı engizý. Prezıdent Qasym-Jomart Toqaev ekonomıkanyń túrli salalaryna tsıfrlandyrý men jasandy ıntellekt quraldaryn jedeldetip engizý mindetin júktedi. Bul qadamnyń barlyǵy jınaqtala kelip, Qazaqstannyń jańa Ulttyq tsıfrlyq damý strategııasyna biriktiriledi, — dedi Erlan Qarın.
Melekettik keńesshi Joldaýda tsıfrlyq transformatsııa men jasandy ıntellektini engizý el úshin jańa ulttyq ıdeıa retinde aıqyndalatynyn aıtty.
— Qazaqstan jańa tehnologııalardy damytý men engizýde keshendi ári júıeli sheshimder qabyldaǵan álemdegi alǵashqy elderdiń biri bolyp otyr. Bul rette Qazaqstan bolashaqta tehnologııalyq turǵydan damyǵan memleket atanýdy kózdeıdi. Osylaısha, bıylǵy Joldaýda tsıfrlyq transformatsııa men jasandy ıntellektini engizý bizdiń el úshin jańa ulttyq ıdeıa retinde aıqyndaldy, — dedi ol.
Memlekettik keńesshi Prezıdent Qasym-Jomart Toqaevtyń jańa saıası bastamalarynyń negizgi qyrlaryna toqtalyp ótti.
— Usynylǵan parlamenttik reforma prezıdenttik saıasattyń «Kúshti Prezıdent — Yqpaldy Parlament — Esep beretin Úkimet» basty formýlasyn damytady. Referendým ótkizý jónindegi usynys Prezıdenttiń el bolashaǵyn aıqyndaıtyn túıindi máselelerge qatysty tek qana kelise otyryp sheshim qabyldaý qaǵıdatynyń ózgermeıtinin kórsetti, — dedi ol.
Prezıdent osymen birneshe ret aldaǵy saıası josparlaryn aldyn ala ári ashyq jarııalady. 2022-2023 jyldardaǵy reformalar da, AES salý jónindegi referendým da kezinde kúni buryn habarlanǵan bolatyn.
— Osy tusta aıryqsha atap óterligi, áńgime Konstıtýtsııaǵa jedel túrde ózgerister engizý nemese Parlament saılaýyn jarııalaý týraly bolyp otyrǵan joq. Maqsat bul emes. Basty ári negizgi maqsat — saıası júıeniń ınstıtýtsıonaldyq negizderin odan ári nyǵaıtý. Sondyqtan Prezıdent oılastyrylǵan, birizdilikke negizdelgen dáıekti tásildi quptaıdy. Eń aldymen sarapshylar men kópshilik qaýym arasynda jan-jaqty ári tereń talqylaý júrgizý qajet. Osylaısha, Qazaqstan kezekti ret kezeń-kezeńimen jáne jan-jaqty júzege asyrylatyn saıası jańǵyrýdyń úlgisin kórsetti, — dep jazdy Erlan Qarın.
Aıta ketelik Qazaqstanda jasandy ıntellekt jáne tsıfrlyq damý mınıstrligi qurylady.
Memleket basshysy Qasym-Jomart Toqaev Úkimetke ekonomıkanyń barlyq salasyn jańǵyrtý úshin jappaı jasandy ıntellektini engizý qajettigin tapsyrdy.