Tsıfrlyq transformatsııa kartalary engizilip jatyr — Jaslan Mádıev

ASTANA. KAZINFORM — Tsıfrlyq transformatsııa kartalaryn engizý aıasynda 72 sala qamtyldy. Bul týraly Úkimet otyrysynda Premer-Mınıstrdiń orynbasary — Jasandy ıntellekt jáne tsıfrlyq damý mınıstri Jaslan Mádıev málim etti. 

— Ekonomıka salalaryna jasandy ıntellektini engizýdiń eki negizgi maqsatyn atap ótý qajet. Birinshisi — ekonomıkalyq ósim. Jasandy ıntellekt ónimdilikti arttyrýdyń negizgi draıverine aınalýy tıis. Bul jeke protsesterdi avtomattandyrý týraly ǵana emes. Jasandy ıntellekt jańa ónimderdi, jańa naryqtardy jáne eksport úshin jańa múmkindikter ashýy qajet. Ekinshisi — bıznesti qoldaý. Jasandy ıntellekt esebinen bıznestiń memleketpen ózara is-qımylyn jeńildetý, ótinish berý formatynan proaktıvti qyzmetterge kóshý jáne bıznes shyǵyndaryn qysqartý qamtamasyz etiledi, — dedi Jaslan Mádıev.

Sonymen qatar ol memlekettik organdarmen birlesip Tsıfrlyq transformatsııa kartalary engizilip jatqanyn aıtty. Búginde 72 sala men qyzmet baǵytyn qamtıtyn 20 karta bekitildi. Atap aıtqanda, ónerkásip, energetıka, aýyl sharýashylyǵy, kólik jáne logıstıka, bilim berý, densaýlyq saqtaý jáne basqa da baǵyttar.

Ár karta:

— negizgi tsıfrlyq syn-qaterlerdi,

— AI-sheshimderdi engizý josparyn,

— 2027 jylǵa deıingi KPI jáne áleýmettik-ekonomıkalyq áserlerdi qamtıdy.

— Protsesterdi jobalaýda jasandy ıntellektini basym qoldanýdy kózdeıtin AI-First qaǵıdatyna sáıkes biryńǵaı arhıtektýralyq tásil qoldanyldy. Bul tásil «elektrondyq úkimettiń» arhıtektýralyq portalynda barshaǵa qoljetimdi. Barlyq ortalyq memlekettik organnyń bekitilgen kartalardy oryndaýy mindetti ekenin atap ótkim keledi, — dedi mınıstr.

Budan buryn habarlanǵandaı, 2035 jylǵa qaraı Qazaqstanda 562 kásip nemese eńbek naryǵynyń 44%-y (shamamen 4 mln adam) jasandy ıntellektiniń yqpalymen ózgerýi múmkin.