Tsıfrlyq teńgeniń tıimdiligi qandaı – Ulttyq bank jaýaby
ASTANA. KAZINFORM — QR Ulttyq banki saýalymyzǵa joldaǵan jaýabynda 18 shildede qoldanysqa enetin tsıfrlyq teńgeniń qandaı artyqshylyqtary bar ekenin málimdedi.
– Tsıfrlyq teńge barlyq paıdalanýshy úshin, atap aıtqanda, jeke tulǵalar, ekinshi deńgeıli bankter, saýda uıymdary, memleket, tólem júıeleri, fınteh-kompanııalar men naryqtyń basqa qatysýshylary úshin jańa perspektıvalar men múmkindikter ashady, – delingen habarlamada.
Ulttyq bank málimetinshe, tsıfrlyq teńgeniń qoldanýshylarǵa beretin artyqshylyqtary men múmkindikteri kóp:
- Innovatsııalardy damytý. Tsıfrlyq teńge qarjylyq qyzmetterge qol jetkizýdi jeńildetý jáne kásipkerlik pen bıznes úshin jańa múmkindikter ashý arqyly tehnologııany damytýǵa yqpal etedi;
- Tólem qaýipsizdigi. Tsıfrlyq teńgeniń zmanaýı krıptografııalyq tehnologııalaryn qoldaný tranzaktsııalardyń qaýipsizdigin arttyrady;
- Tólemderdiń qoljetimdiligi. Tsıfrlyq teńge qarjylyq qyzmetterdi shalǵaıdaǵy aımaqtardy qosa alǵanda, jalpy halyqqa qoljetimdi ete alady;
- Tólem tıimdiligi. Tsıfrlyq teńge arqyly esepteýlerdi jedeldetý jáne jeńildetý shyǵyndardy azaıtyp, qarjylyq operatsııalardyń tıimdiligin arttyrady;
- Ashyqtyq pen anonımdilik arasyndaǵy tepe-teńdik. Tańbalaý jáne ony avtomatty túrde alý tetiginiń bolýy azamattardyń anonımdiligine nuqsan keltirmeıdi. Bul úderis bank qupııasyn saqtaı otyryp, memlekettik tólemderdiń maqsatty jumsalýyn qamtamasyz etýge múmkindik beredi;
- Tólemderdiń yńǵaılylyǵy. Tsıfrlyq teńge paıdalanýshyǵa úırenshikti quraldardy (uıaly telefondar men kartalar) paıdalana otyryp, tólemderdi jedel júzege asyrýǵa múmkindik beredi.
Aıta keteıik, buǵan deıin Ulttyq bank «tsıfrlyq teńge» uǵymyna anyqtama bergenin jazǵanbyz.
