Tsıfrlyq teńgeni keńinen qoldaný shyn máninde «oıyn erejesin» ózgertedi – Memleket basshysy
ASTANA. KAZINFORM – Almatyda Prezıdenttiń tóraǵalyǵymen Jasandy ıntellektini damytý jónindegi keńestiń ekinshi otyrysynda Memleket basshysy Tsıfrlyq teńgeni keńinen qoldaný shyn máninde «oıyn erejesin» ózgertetinin málim etti.
Qasym-Jomart Toqaev ekonomıkany tsıfrlandyrý zaman talaby ekenin aıtty. Bul rette Prezıdent Birikken Arab Ámirlikteri qolma-qol tólemsiz ekonomıkaǵa kóshýdi josparlap otyrǵanyn mysalǵa keltirdi.
Qytaıdan da úlgi alýǵa bolady. Kórshiles el jyl saıynǵy trıllıon dollar tranzaktsııalardy tsıfrlyq platformada óńdeý isin jolǵa qoıdy.
– Qazaqstan da bul baǵytta oń nátıjege qol jetkizdi: elimizdegi qolma-qol aqshasyz tólemderdiń úlesi 80 paıyzdan asty. Osy jıynǵa qatysyp otyrǵan otandyq fın-teh kompanııalar kásibı deńgeıleri joǵary ekenin kórsetti. Tsıfrlyq teńgeni keńinen qoldaný shyn máninde «oıyn erejesin» ózgertedi. Óıtkeni bıýdjettiń ashyqtyǵyn qamtamasyz etip, tranzaktsııa úshin alynatyn komıssııalyq tólemderdiń shyǵynyn qysqartady. Bul Qazaqstannyń dúnıe júzinen kóbirek kapıtal tartyp, jetekshi ınvestıtsııalyq jáne qarjylyq ortalyqqa aınalýyna kómektesýge tıis. Byltyr elimizde alǵash ret tsıfrlyq aktıvter men krıptovalıýtany retteıtin quqyqtyq baza qalyptasty. Jyljymaıtyn múlikti, altyndy, iri óndiris kásiporyndarynyń aktsııalaryn jáne basqa da aktıvterdi tokenızatsııa jasaýǵa múmkindik paıda boldy. Maqsatymyz – aımaqtaǵy jetekshi krıptohabqa aınalý. Úkimet pen Ulttyq bank tsıfrlyq aktıvterdi damytýdyń basty baǵyttaryn bekitkeni jón. Bul – shuǵyl mindet, ýaqyt kútpeıdi, – dedi Qasym-Jomart Toqaev.
Prezıdent «naqty ýaqyt ekonomıkasyna» kóshý óte mańyzdy ekenine nazar aýdardy. Sebebi dástúrli júıede memleket únemi «izinen qýyp» otyrady.
– Mysaly, bıýrokratııalyq rásimder men bitpeıtin kelisýler qarjynyń tıimdiligin 30 paıyzǵa deıin azaıtady. Tekseris salyq jınaý kezeńiniń qorytyndysy boıynsha júrgiziledi. Al ol kezde bıýdjet qarjysy áldeqashan ıgerilip qoıady. Jasandy ıntellekt arqyly kúsheıtilgen platformalyq tásil bul rette edáýir alǵa ozýǵa jaǵdaı jasaıdy. Atap aıtqanda, úzdiksiz predıktıvti monıtorıng maqsatsyz nemese kúmándi tranzaktsııalardy aldyn ala anyqtaıdy. Bul rette tek memleket resýrsyna senim artý strategııalyq turǵydan qate ekenin eskertkim keledi. Qabyldanǵan platformalyq sheshim jeke kapıtaldyń básekege qabilettiligin saqtaıtyn basty qural bolýǵa tıis. Negizgi mindet – osyndaı ınstıtýtsıonaldyq orta qalyptastyrý. Úkimet bıznesti yntalandyratyn naqty usynystar engizýi kerek, – dedi Memleket basshysy.
Osyǵan deıin Prezıdent aldymyzǵa Qazaqstandy zamanaýı tsıfrlyq memleketke aınaldyrý jóninde órshil maqsat qoıǵanymyzdy atap ótti.
