Tsıfrlyq teńgege ulttyq valıýta mártebesi beriledi

ASTANA. KAZINFORM – Qarjy naryǵyn retteý jáne damytý agenttiginiń tóraıymy Mádına Ábilqasymova tsıfrlyq teńgege ulttyq valıýta mártebesin beretin zań normasyn tanystyrdy.

- Zań jobasynyń negizgi jańalyǵy – aktıvterdiń jańa klasy retinde tsıfrlyq qarjy aktıvterin retteýdi engizý. Zań jobasynda tsıfrlyq qarjy aktıvteriniń úsh túri kózdelgen. Birinshisi – aqshaǵa talap etý quqyǵyn rastaıtyn steıblkoınder, ekinshisi – bazalyq aktıvpen qamtamasyz etilgen tsıfrlyq qarjy aktıvteri, úshinshisi – tsıfrlyq nysanda shyǵarylatyn qarjy quraldary, - dedi ol.

Aıtýynsha, steıblkoınderdiń shyǵarylymy men aınalymyn Ulttyq Bank retteıdi. Basqa tsıfrlyq qarjy aktıvteriniń túrlerin agenttik retteıdi.

- Tsıfrlyq qarjy aktıvterin qarjy naryǵynyń jańa sýbektileri, ıaǵnı tsıfrlyq platformalar operatorlary shyǵarady. Tsıfrlyq qarjy aktıvterine qoldanystaǵy qarjy quraldary úshin belgilengen uqsas talaptar, onyń ishinde táýekelderdi basqarýǵa, aqparatty jarııa etýge jáne ınvestorlardyń quqyqtaryn qorǵaýǵa qatysty talaptar qoıylady. Tsıfrlyq teńgeniń ulttyq valıýtanyń jańa nysany retindegi mártebesi zańnamalyq túrde bekitiledi, - dedi Mádına Ábilqasymova.

Aıta keteıik, Ulttyq bank pen Qarjy naryǵyn damytý jáne retteý agenttigi Májiliste bankter týraly zań jobasyn tanystyrdy.