Tsıfrlyq teńge jobasy qalaı júzege asady
Qazaqstan Ulttyq banki (QUB) men Qazaqstannyń ulttyq tólem korporatsııasy (Korporatsııa, «UTK» AQ) Qazaqstan Respýblıkasynda ulttyq tsıfrlyq valıýtany engizý jónindegi «Tsıfrlyq teńge: birinshi kezeńdi iske asyrý jospary» mártebe-baıandamasy jarııalanǵanyn málimdedi, dep habarlaıdy QazAqparat.
Qujattyń maqsaty – jobanyń qazirgi mártebesi men osy jyldyń sońyna deıin kútiletin nátıjeler týraly habardar etý. Baıandamada tsıfrlyq valıýtalardy iske asyrý salasyndaǵy ózge de memleketterdiń tájirıbesine sholý jasalǵan.
"Tsıfrlyq teńge 2025 jyldyń sońyna deıin 3 fazada engiziledi. Jobany iske asyrý jol kartasyna sáıkes, 2023 jyly birinshi kezeń iske asyrylady. Tsıfrlyq teńge platformasynyń – tájirıbeli-ónerkásiptik jáne zertteý (R&D) atty eki kontýry (damý baǵyty) quryldy.
Tájirıbeli-ónerkásiptik paıdalaný aıasynda tsıfrlyq teńgeni tólem quraly retinde paıdalaný úshin barlyq bazalyq stsenarıı iske asyrylady, qarjy naryǵynyń qatysýshylarymen jáne qarjy ınfraqurylymynyń provaıderlerimen ıntegratsııalyq baılanys ornatylady. Sondaı-aq smart-kelisimsharttardy paıdalaný arqyly baǵdarlamalanatyn tólemder tetigi engiziledi. Bul kontýr TsT júıesiniń negizgi fýnktsıonaldyǵyn jáne onyń keıingi jumysyn júzege asyrýǵa arnalǵan", - delingen Ulttyq banktiń jazbasynda.
Zertteý kontýry aıasynda ortalyq bankterdiń tsıfrlyq valıýtalarynda transshekaralyq esep aıyrysýlar testileýden ótedi, tsıfrlyq aktıvter ındýstrııasy naryǵyna qatysýshylarmen ózara baılanys ornatylyp, tokendelgen aktıvter úshin eseptik ınfraqurylym retinde tsıfrlyq teńge paıdalanylady.
Jobanyń І fazasyn iske asyrý qorytyndysy 2023 jyly ulttyq valıýtanyń 30 jyldyǵyna oraı ótetin Qazaqstan qarjygerleriniń kongresi aıasynda shyǵarylady. Tolyqqandy nátıjesi 2023 jylǵy jeltoqsanda qorytyndy esep (blueprint paper) formatynda usynylady.
Aıta keteıik, tsıfrlyq teńge qolma-qol jáne qolma-qolsyz aqshalardyń ornyn aýystyrýǵa baǵyttalmaǵan, ol qoldanysta qatar júre beredi. Tsıfrlyq teńge qarjylyq qyzmetterdiń qoljetimdiligin arttyrady, ınnovatsııalyq qarjy ónimderin jasaý úshin jańa múmkindikter ashady, memlekettik shyǵystardyń tıimdiligin eseleıdi, sondaı-aq transshekaralyq tólemderde shyǵyndy azaıtady.