Tsıfrlyq teńge: ulttyq valıýtanyń jańa múmkindigi

ASTANA. KAZINFORM – Búgin, 15 qarasha – Ulttyq valıýta kúni. Tól teńgemizdiń aınalymǵa engenine bıyl 33 jyl tolady. Osy ýaqyt ishinde ulttyq valıýtamyz da zaman talabyna saı ózgerip, tsıfrlyq formatqa kóshti.

Tsıfrlyq teńgeni qolma-qol aqshaǵa aınaldyrýǵa bola ma
Foto: Kazinform

33 jyl ishinde ulttyq valıýtanyń dızaıny bes ret jańardy. Alǵashqy banknotalar portrettik úlgide jasalyp, aqsha betinde tarıhı tulǵalar beınelendi. Al búgingi banknotalar saq stılinde bezendirilgen. Teńgeniń ekonomıkalyq tarıhy da ońaı bolǵan joq. Bes márte devalvatsııaǵa ushyrap, túrli kezeńdi bastan ótkerdi.

ulttyq valıýtanyń jańa múmkindigi
Foto: vıdeodan skrın

-  «Saq stıli» serııasyndaǵy alty nomınaldyń beseýi aınalymǵa shyǵaryldy. Endi serııa 20 myń teńgelik jańa banknotamen tolyqpaq. Bizdiń maqsatymyz teńgeniń dızaıny arqyly ulttyq mádenı murany dáripteý. Óıtkeni ár banknot eldiń tarıhy men qundylyqtaryn tanytady, - dedi QR Ulttyq bankiniń bas mamany, bas dızaıneri Sanjar Nurqasymov.

ulttyq valıýtanyń jańa múmkindigi
Foto: vıdeodan skrın

Búginde dástúrli aqshamyz tsıfrlyq formatqa aýysty. 2023 jyly tsıfrlyq teńgege baılanǵan alǵashqy bank kartasy aınalymǵa shyǵyp, 2025 jyly memlekettik satyp alý men ınfraqurylymdyq jobalarda synaqtan ótti. Al, bıyl 18 shildede resmı qoldanysqa engizilip, memlekettik satyp alý salasynda paıdalanylyp jatyr.

- Tsıfrlyq teńge birtindep engiziledi. Aldymen memlekettik satyp alýlar men bıýdjettik jobalarda qoldanylady. Bul qarajattyń maqsatty jumsalýyn baqylaýǵa jáne tólemderdiń tıimdiligin baǵalaýǵa múmkindik beredi, - Astana halyqaralyq qarjy ortalyǵynyń ınvestıtsııa jáne qarjy naryqtary jónindegi sarapshysy Anatolıı Chernyh.

ulttyq valıýtanyń jańa múmkindigi
Foto: vıdeodan skrın

Bolashaqta tsıfrlyq teńgeni azamattar kúndelikti esep aıyrysý kezinde de paıdalanady. Tipti ınternet baılanysy bolmaǵan jaǵdaıda da taýarlar men qyzmetterdiń aqysyn tóleýge múmkindik týady.

- Tsıfrlandyrý ekonomıkada mańyzdy ról atqarýyn jalǵastyra otyryp, qolma-qol aqshadan bas tartýdy bildirmeıdi. Qazirgi ýaqytta aınalymdaǵy qolma-qol aqsha kólemi 5 trıllıon teńgeden asady, al sońǵy 5 jylda onyń ortasha jyldyq ósý qarqyny shamamen 10%-dy quraıdy, - QUB Qolma-qol aqsha aınalysy departamentiniń bas maman-ekonomısi Amına Jolmyrza.

 

ulttyq valıýtanyń jańa múmkindigi
Foto: vıdeodan skrın

Tsıfrlyq teńgeni memlekettik qarjy salasynda keńinen qoldaný úshin Ulttyq bank pen Úkimet arnaıy jol kartasyn bekitken. Qazirdiń ózinde aınalymǵa shamamen 340 mlrd tsıfrlyq teńge shyǵarylǵan. Aldaǵy ýaqytta bul kórsetkish 2 trln teńgege jetýi múmkin.

Aıta keteıik, Qazaqstan qor bırjasyndaǵy (KASE) saýda-sattyq qorytyndysy boıynsha dollar baǵamy arzandady.