Tsıfrlyq teńge arqyly tabys tabýdy usynǵandarǵa senbeńiz – Ulttyq bank

ASTANA. KAZINFORM – Qazaqstan Ulttyq banki tsıfrlyq teńgege qatysty jalǵan ınvestıtsııalyq usynystar arqyly jasalatyn alaıaqtyq shemalardyń kóbeıgenin málimdedi.

Vedomstvonyń habarlaýynsha, sońǵy ýaqytta áleýmettik jelilerde «tsıfrlyq teńge memlekettik ınvestıtsııalyq jobasy» týraly jalǵan jarnamalar belsendi taralyp jatyr.

– Alaıaqtar azamattardy qysqa merzim ishinde joǵary tabys tabýǵa bolatynyna sendirip, memleket pen Ulttyq Bank atynan kepildik beriletinin alǵa tartady. Osy arqyly olar paıdalanýshylardy fıshıngtik saıttarǵa baǵyttaıdy, – dep habarlady Ulttyq Bank.

Atalǵan shemalarda «shekteýli usynys» nemese «sońǵy múmkindik» degen jeleýmen adamdardy jalǵan jobalarǵa aqsha salýǵa ıtermeleıdi. Sonymen qatar jalǵan platformalarda «ósip jatqan paıda» kórsetiletin jeke kabınetter jasalyp, azamattardy qaıta ınvestıtsııa jasaýǵa kóndiredi.

Ulttyq bank tsıfrlyq teńge ulttyq valıýtanyń tsıfrlyq nysany jáne zańdy tólem quraly ekenin atap ótti.

– Tsıfrlyq teńge ınvestıtsııalyq qural bolyp tabylmaıdy jáne tabys tabýǵa arnalmaǵan, – delingen habarlamada.

Osyǵan baılanysty azamattarǵa ınternettegi kúmándi siltemelerge ótpeý, belgisiz nómirlerden kelgen qońyraýlarǵa saq bolý usynyldy. Aqparatty tek resmı derekkózderden tekserý qajet ekeni eskertildi.

Sondaı-aq Ulttyq bank derbes derekterdi jarııa etpeýge, SMS-kodtar men bank kartasynyń málimetterin bógde adamdarǵa bermeýge jáne úshinshi tulǵalarǵa aqsha aýdarmaýǵa shaqyrdy.

Vedomstvo ókilderi Ulttyq bank qyzmetkerleri aýdıo nemese beıneqońyraý shalmaıtynyn, jeke tulǵalardyń shottaryna qyzmet kórsetpeıtinin jáne ınvestıtsııalyq usynystar jasamaıtynyn atap ótti.

Alaıaqtyq faktilerine tap bolǵan jaǵdaıda azamattarǵa quqyq qorǵaý organdaryna júginý qajet.

Qosymsha aqparat alý úshin 1477 qysqa nómiri arqyly Ulttyq banktiń baılanys ortalyǵyna habarlasýǵa bolady.

Aıta keteıik, buǵan deıin Qarjylyq monıtorıng agenttigi de jańa alaıaqtyq shemalar týraly eskertti.