Tsıfrlyq tehnologııalar Qazaqstannyń rekordtyq astyq jınaýyna kómektesti — Toqaev
ASTANA. KAZINFORM — Aýyl sharýashylyǵynyń ornyqty damýyn qamtamasyz etý — strategııalyq mindettiń biri. Bul týraly Memleket basshysy Qasym-Jomart Toqaev Sheteldik ınvestorlar keńesiniń 38-shi plenarlyq otyrysynda aıtty.
Prezıdenttiń aıtýynsha, búginde JI men zamanaýı avtomattandyrý tehnologııalary jańa agrarlyq revolıýtsııanyń ózegine aınalyp keledi.
— Munyń bári egistik ónimin aıtarlyqtaı arttyryp, sýdy únemdep paıdalanýǵa jáne qorshaǵan ortaǵa keletin zııandy eleýli túrde azaıtýǵa múmkindik beredi. Bul úderisterdiń mańyzdy ekenin jaqsy túsinemiz. Dálme-dál josparlaý jáne boljamdy saraptama úshin tsıfrlyq tehnologııalardy qoldaný arqyly elimiz ekinshi jyl qatarynan 27 mıllıon tonna astyq jınady. Bul — rekordtyq kórsetkish. Osy nátıjeni saqtap qalý úshin aýyl sharýashylyǵy alqaptaryn tolyq tsıfrlandyrýǵa kiristik. Ushqyshsyz ushatyn apparattardy, jerserik navıgatsııalaryn jáne avtomattandyrylǵan meteorologııalyq stantsııalardy jedel iske qosa bastadyq, — dedi Q. Toqaev.
Memlekettik qoldaýdyń barlyq sharasy jáne aýyl sharýashylyǵy taýaryn óndirýshilerge sýbsıdııa berý isi tsıfrlyq formatqa kóshirilip jatyr. Bul ákimshilik rásimderdi edáýir qysqartady.
Mal sharýashylyǵynda da ıntegratsııalanǵan tsıfrlyq platforma iske qosyldy. Sonyń arqasynda qaǵaz júzindegi qujat aınalymynan bas tartýǵa jáne derekterdiń durystyǵyn qamtamasyz etýge múmkindik týady.
— Búginde 200-den astam aýyl sharýashylyǵy kásiporny «aqyldy ferma» formatynda jumys isteı bastady, ıaǵnı sharýashylyqtar ozyq tsıfrlyq tehnologııalardy paıdalaný men derekterdi taldaý negizinde basqarylady. Budan bólek, óndirýshiden tutynýshyǵa deıingi jetkizý tizbeginiń tolyq ashyqtyǵyn qamtamasyz etip, ónim qozǵalysyn baqylaıtyn tsıfrlyq júıe engizilip jatyr, — dedi Memleket basshysy.
Buǵan deıin Qasym-Jomart Toqaev Sheteldik ınvestorlar keńesiniń jańa múshelerin tanystyrǵan edi.
