Tsıfrlyq tehnologııalar energetıka salasyn jańa deńgeıge shyǵaryp otyr — CNPC
ASTANA. KAZINFORM — Tsıfrlyq tehnologııalar jahandyq ónerkásip júıesin, energetıka sektoryn jáne halyqaralyq yntymaqtastyqtyń jańa modelin qalyptastyryp jatyr. Bul týraly Qazaqstan Respýblıkasy janyndaǵy Sheteldik ınvestorlar keńesiniń 38-plenarlyq otyrysynda CNPC vıtse-prezıdenti Sýn Daıýn málimdedi.
Onyń aıtýynsha, jasandy ıntellekt pen tsıfrlyq egemendik taqyryby qazirgi álemdik damý úrdisterine tolyq sáıkes keledi. Energetıka jáne munaı-hımııa salalarynda tsıfrlandyrý tehnologııalyq jańǵyrtý quraly ǵana emes, óndiristik úderisterdi qaıta quryp, kásiporyndardyń básekege qabilettiligin arttyratyn strategııalyq faktorǵa aınalyp otyr.
— 30 jylǵa jýyq ýaqyt ishinde Qazaqstan men Qytaıdyń energetıkalyq áriptestigi munaı-gaz salasynyń barlyq óndiristik tizbegin qamtıtyn keshendi júıege aınaldy. Bul úderiste tsıfrlyq tehnologııalar óndiristiń tıimdiligin arttyrýdyń mańyzdy quralyna aınaldy, — dedi ol.
Sýn Daıýnnyń aıtýynsha, aldaǵy kezeńde CNPC qazaqstandyq seriktestermen yntymaqtastyqty tórt negizgi baǵyt boıynsha tereńdetýge nıetti.
Atap aıtqanda, óndiristik operatsııalardy tsıfrlandyrýdy keńeıtý, munaı-gaz ken oryndary, magıstraldyq qubyrlar jáne munaı óńdeý zaýyttarynda onlaın monıtorıng pen óndiristi basqarýdyń zamanaýı sheshimderin engizý kózdelip otyr.
Sondaı-aq ıntellektýaldy tehnıkalyq qyzmet kórsetý júıelerin damytý, jabdyqtardyń jaı-kúıin aldyn ala boljaý jáne tsıfrlyq basqarý quraldaryn engizý josparlanǵan.
Budan bólek, kompanııa geologııalyq zertteýlerde, óndiristik protsesterdi ońtaılandyrýda, basqarýshylyq sheshimder qabyldaýda jáne kadr daıarlaýda jasandy ıntellekt tehnologııalaryn, onyń ishinde «Kýnlýn» úlken tildik modelin qoldaný boıynsha yntymaqtastyqty kúsheıtýdi usynady.
Sonymen qatar derekterdi basqarý júıesin jetildirý, biryńǵaı tsıfrlyq standarttardy qalyptastyrý jáne joǵary bilikti mamandar daıarlaý baǵytyndaǵy birlesken jumystar jalǵasady.
— Biz tsıfrlyq tehnologııalardyń múmkindikterin paıdalana otyryp, Qazaqstan men Qytaı arasyndaǵy energetıkalyq yntymaqtastyqty jańa sapalyq deńgeıge kóterýge nıettimiz. Bul óńirdiń energetıkalyq qaýipsizdigin nyǵaıtýǵa, ónerkásipti jańǵyrtýǵa jáne ornyqty damýǵa yqpal etedi, — dedi CNPC vıtse-prezıdenti.
Buǵan deıin Qazaqstannyń biregeı geosaıası orny onyń bolashaq damý múmkindikterin aıqyndaıtynyn jazǵanbyz.
