Tsıfrlyq tehnologııalar áskerı qyzmetshilerdiń quqyǵyn qorǵaýdy kúsheıtedi
ASTANA.KAZINFORM — Qarýly kúshterde áskerı qyzmetshilerdiń qaýipsizdigin arttyrýǵa, áskerı tártipti nyǵaıtýǵa jáne quqyq buzýshylyqtardyń aldyn alý júıesin jetildirýge baǵyttalǵan zamanaýı tsıfrlyq tehnologııalardy engizý jumystary jalǵasyp jatyr.
Osy baǵyttaǵy perspektıvaly jobalardyń biri — jasandy ıntellekt elementteri bar ıntellektýaldy beıneanalıtıka júıelerin qoldaný. Jańa tehnologııalar áskerı bólimderdegi ahýaldy táýlik boıy baqylaýǵa, yqtımal qaýipti jaǵdaılardy der kezinde anyqtaýǵa, belgilengen tártiptiń buzylýyn tirkeýge jáne tıisti sharalar qabyldaý úshin jaýapty laýazymdy tulǵalardy jedel habardar etýge múmkindik beredi.
Áskerde áskerı qyzmetshilerdiń qaýipsizdigin qamtamasyz etý máselesine erekshe kóńil bólinedi. Áskerı bólimderge kelgen merzimdi áskerı qyzmetshileri jas jaýynger kýrsynan jáne áskerı qyzmet jaǵdaılaryna beıimdelý baǵdarlamasynan ótedi. Jeke quramnyń psıhologııalyq jaı-kúıin anyqtaýǵa arnalǵan dıagnostıkalyq tekserýlerdi áskerı psıhologtar turaqty túrde júrgizip otyrady. Sondaı-aq áskerı qyzmetshilerdiń moraldyq-psıhologııalyq jaǵdaıyna turaqty monıtorıng jasalady.
Áskerı bólimderde beınebaqylaý júıeleri men áskerı polıtsııa pýnktteri jumys istep, kún saıyn profılaktıkalyq is-sharalar ótkiziledi. Merzimdi qyzmet sarbazdaryna telefon baılanysy jáne «Otbasymen beıneqońyraý» servısi arqyly týystarymen turaqty baılanys ornatýǵa múmkindik berilgen.
Áskerdegi quqyq buzýshylyqtar men tótenshe jaǵdaılardyń aldyn alý maqsatynda «Qatarlas», «Pıramıda» jáne «Jaýyngerlik dos» tsıfrlyq baqylaý jáne monıtorıng júıeleri, sondaı-aq quqyq buzýshylyqtar men jeke quramnyń qaza bolýyn boldyrmaýǵa baǵyttalǵan algorıtmder kesheni qoldanylady.
Quqyqtyq tártipti saqtaýda komandırler men serjanttyq quramnyń róli erekshe. Olar áskerı ujymdardy basqarý, tártipti nyǵaıtý jáne janjaldy jaǵdaılardyń aldyn alý máseleleri boıynsha arnaıy daıarlyqtan ótedi.
Áskerı qyzmetshilerdiń quqyqtarynyń saqtalýyn baqylaý ata-analar komıtetterimen jáne Sarbaz analary komıtetimen ózara is-qımyl aıasynda júzege asyrylady. Aqparat almasýdy jedeldetý maqsatynda áskerı bólim komandırleriniń qatysýymen ata-analar chattary qurylǵan.
Budan bólek, «Tsıfrlyq aldyn-alý» vedomstvoaralyq baǵdarlamasy aıasynda Qorǵanys mınıstrligi áskerı qyzmetshilerdiń QR-kod arqyly ótinish berý júıesin engizdi. Jańa servıs áskerı qyzmetshilerdiń quqyqtaryn qorǵaýdyń qosymsha tetigin qamtamasyz etip, «Zań jáne tártip» qaǵıdatyn nyǵaıtýǵa yqpal etedi.
Aıta ketelik Qarýly kúshterde jańa transformatsııa ortalyǵy iske qosylǵan edi.
