Tsıfrlyq tehnologııalar ádilet salasyndaǵy qandaı laýazymdardy qysqartýy múmkin

ASTANA. KAZINFORM –  Ádilet mınıstri Erlan Sársembaev Úkimet otyrysynan keıin ótken baspasóz máslıhatynda tsıfrlyq tehnologııalar ádilet salasyndaǵy qandaı laýazymdardy qysqartýy múmkin ekenin aıtty.

- Búgin Premer-mınıstr sizge tsıfrlyq tehnologııalardyń kómegimen memlekettik apparattaǵy artyq adamdar men qurylymdardy qysqartýdy tapsyrdy. «Artyq» adamdardyń artyq ekenin qalaı anyqtaısyzdar? Jalpy neshe adamdy qysqartý josparda bar? - dep surady jýrnalıst.

Mınıstr ádilet salasynda jumysshy sany qysqarýy múmkin baǵyttardy atady.

- Biz osy jumysty qatarymen júrgizemiz. Úkimet otyrysynda birqatar usynystardy aıttym. Ásirese sot saraptamasy júıesinde problema bar. Sodan keıin sot oryndaýshylardyń arasynda bolyp jatqan problemalardy aıttym. Sonyń bárin tsıfrlandyryp, robot sot oryndaýshylardyń arqasynda birqatar laýazymdardy qysqartsaq degen oıymyz bar, - dedi Erlan Sársembaev.

Vedomstvo basshysy bul máselede túbegeıli sheshim qabyldaý úshin áli taldaý júrip jatqanyn aıtty.

- Mınıstrliktiń saıasaty – halyqqa qyzmet kórsetý sapasyn arttyrý. Sol tezıstiń arqasynda biz kórsetilgen qyzmettiń ashyqtyǵyn qamtamasyz etemiz. ıAǵnı, qysqartý basty nazarda emes. Biraq qyzmetterdiń sapasy men qoljetimdiligin arttyrý úshin birqatar laýazymdy qysqartýǵa daıynbyz. Ony naqty aıtý úshin tsıfrlandyrylǵan pılottyq jobalardyń qanshalyqty sátti iske asatynyn kórýimiz kerek, - dedi mınıstr.

Aıta ketý kerek, Premer-mınıstr Oljas Bektenov búgin Úkimet otyrysynda memlekettik apparattaǵy artyq adamdardy tsıfrlandyrý arqyly qysqartý kerektigin málim etti.