Tsıfrlyq tańbalaý taýar naryǵyndaǵy tártipti kúsheıtti

ASTANA. KAZINFORM – Qazaqstanda mindetti tsıfrlyq tańbalaýǵa jatatyn taýar túrleriniń qatary keńeıip keledi. Bir jyl buryn bul júıe úsh sanattaǵy taýardy qamtysa, qazir olardyń sany jetige jetken. Bul týraly Prezıdenttiń kómekshisi Qýanyshbek Esekeev elordada ótken Digital Tañba forýmynda aıtty.

p
Foto: Digital tanba

Onyń aıtýynsha, tsıfrlyq tańbalaý el ekonomıkasyn tolyq tsıfrlandyrý jolyndaǵy mańyzdy tetiktiń birine aınaldy. Alǵashynda túrli saýal men kúmán týdyrǵan joba búginde jeke sala retinde qalyptasyp keledi.

– Tańbalaý ońaı joba bolǵan joq. Bastapqyda oǵan senimmen qaraǵandar kóp emes edi. Qazir bul tutas bir ındýstrııaǵa aınaldy. Kelesi qadam – tolyqqandy tsıfrlyq ekonomıkaǵa kóshý. Osy baǵyttaǵy bastamalardy ilgeriletý úshin jaqyn arada tsıfrlyq ekonomıka qaýymdastyǵyn qurýdy da josparlap otyrmyz. Bir jyl buryn nebári úsh taýar sanaty tańbalansa, qazir olardyń sany jetige jetti, – dedi Qýanyshbek Esekeev.

Prezıdent kómekshisi tsıfrlyq tańbalaýdyń alǵashqy nátıjeleri, ásirese, farmatsevtıka salasynda baıqalǵanyn atap ótti. Onyń sózinshe, bul júıe arqyly dári-dármek aınalymyn retteýge jáne memlekettik satyp alý kezindegi zańsyzdyqtardyń jolyn kesýge bolady.

– Tańbalaýdyń arqasynda dári-dármek salasynda, memlekettik tapsyrys aıasynda birshama tártip ornaǵany qýantady. Jyl ortasyndaǵy statıstıka esimde. Densaýlyq saqtaý mınıstrligi kóptegen kontrafaktilik ónimdi, tipti memlekettik mekemelerge tıesili bolýy tıis dárilerdi de anyqtaǵan edi. Osy baǵytta kúres bastaldy, – dedi ol.

Sonymen qatar tsıfrlyq tańbalaý temeki ónimderi men syra sııaqty aktsızdeletin taýarlardyń aınalymyn baqylaýǵa múmkindik beredi. Bıyl qyrkúıek aıynan bastap júıege bıologııalyq belsendi qospalar da engizile bastady. Qýanyshbek Esekeev munyń mańyzy zor ekenin atap ótti. Óıtkeni mundaı ónimderdiń naryqtaǵy úlesi aýqymdy ári sapasy tutynýshylardyń densaýlyǵyna tikeleı áser etedi.

Tsıfrlandyrýdaǵy kelesi mańyzdy qadamdardyń biri – Ulttyq taýarlar katalogyn engizý. Bul júıe Qazaqstan naryǵyndaǵy ónimderdiń biryńǵaı tizimin qalyptastyryp, olardyń shyǵý tegi men aınalymyn baqylaýǵa jol ashady.

Prezıdent kómekshisiniń aıtýynsha, tutynýshy dúken sóresindegi taýardyń qandaı ónim ekenin jáne qaıdan jetkizilgenin bilýi kerek. Budan bólek, taýardyń bir bóligi túbirtekte kórsetilmeı qalatyn jaǵdaılardyń da joly kesilmek. Qazir ónim týraly málimettiń saýda túbirteginde tolyq ári durys kórsetilýine qatysty talaptar engizilip jatyr.

– Mundaı jobalar neǵurlym kóp júzege assa, ekonomıkamyz da soǵurlym jyldam tsıfrlyq júıege kóshedi. Sonda taýar aǵynyn sáıkestendirý, esepke alý jáne qozǵalysyn qadaǵalaý arqyly tolyq baqylaýǵa múmkindik týady, – dedi Qýanyshbek Esekeev.

Ol tsıfrlyq tańbalaýdyń adal kásipkerliktiń damýyna da oń yqpal etip otyrǵanyn aıtty. Atap aıtqanda kontrafaktilik ónimmen kúrestiń nátıjesinde sheteldik aıaqkıim brendteri Qazaqstan naryǵyna resmı túrde shyǵýǵa belsendilik tanyta bastaǵan.

Aldaǵy ýaqytta taýar aınalymyn tsıfrlandyrýǵa baǵyttalǵan jobalar jalǵasyn taýyp, tıisti bastamalardy ilgeriletý úshin tsıfrlyq ekonomıka qaýymdastyǵyn qurý kózdelip otyr.

Eske salsaq, Qazaqstanda turmystyq gaz ballondaryna mindetti tańbalaý engiziledi.