Tsıfrlyq sýdıalar, advokattar, prokýrorlar daıyndaýymyz qajet - depýtat
ASTANA. KAZINFORM – Tsıfrlyq zańdardy iske asyrý úshin tsıfrlyq sýdıalar, advokattar, prokýrorlar men zań keńesshilerin daıyndaýymyz qajet. Bul týraly Májiliste ótip jatqan parlamenttik tyńdalymda depýtat Ekaterına Smyshlıaeva aıtty
- Tsıfrlyq quqyqtyq orta barlyq salada tepe-teń ári bir mezette damýy tıis. Tsıfrlyq zańdarmen qatar, qylmystyq, ákimshilik jáne is júrgizý zańnamasyna júıeli ózgerister engizý qajet. Qazirgi tańda onda tsıfrlyq ortadaǵy quqyq buzýshylyqtardy tergeýge arnalǵan tsıfrlyq dáleldemeler men tsıfrlyq krımınalıstıka tetikteri joq. Sonymen qatar, Jasandy ıntellekt týraly zań kúshine engennen keıin salalyq zańnamany beıimdeý qajet bolady. Kelesi mańyzdy jaıt, búkil álemde quqyqtyq modelder zańdarmen qatar zańnamalyq normatıvtik-quqyqtyq aktilerdiń, etıkalyq jáne tehnıkalyq standarttardyń, korporatıvtik saıasattardyń da mańyzdy ról atqaratyndaı etip qalyptasýda, - dedi depýtat.
Onyń aıtýynsha, eksperımenttik quqyqtyq rejımder tájirıbesi taralyp jatyr. Bul qatań quqyqdyń damýǵa kedergi keltirýi múmkin degen alańdaýshylyqpen baılanysty.
- Degenmen, mundaı tásildiń jumys isteýi úshin sapaly saraptama, aýdıt, baqylaý jáne standarttaý ınstıtýttaryn qalyptastyrý qajet. Qazirgi zańnamada aýdıt mindetti nemese erikti sıpatta bolǵandyqtan daıyndyqqa ýaqyt bar. Algorıtmderdi ádilettilik, ornyqtylyq jáne qaýipsizdik turǵysynan tekserý qazirdiń ózinde ózekti. Halyqaralyq standarttarǵa saı, biraq ulttyq erekshelikterdi eskere otyryp, tehnıkalyq standarttardy jańartý jáne engizý qajet bolady, - dedi ekaterına Smyshlıaeva.
Depýtat jaqyn arada engizý deńgeıin baǵalaýǵa arnalǵan ulttyq ındekstermen jumys isteý kerektigin aıtady. Sebebi halyqaralyq reıtıngterdiń baılanystylyǵy men beıtaraptyǵy ishki sheshimder úshin naqty kórinisti árdaıym kórsete bermeıdi.
- Retteýdiń mańyzdy aspektileriniń biri — tsıfrlyq zańdardyń tehnıkalyq erekshelikterge toly bolýy, jańa uǵymdardyń gýmanıtarlyq túsinik úshin kúrdeliligi. Mundaı zańdardy iske asyrý úshin tsıfrlyq sýdıalar, advokattar, prokýrorlar men zań keńesshilerin daıyndaýymyz qajet. Áıtpese, qatelikterge jol berilýi múmkin. JI dáýirindegi tsıfrlyq quqyqtyń taǵy bir erekshelik ereksheligi búginde zańdardy zańgerler oqıdy. Al erteń olardy algorıtmder de túsine alýy tıis. Sondyqtan dál qazirdiń ózinde mashınamen oqylatyn normatıvtik-quqyqtyq aktiler formaty týraly oılanýymyz qajet, - dedi ol.
Aıta keteıik, tyńdalym barysynda Májilis tóraǵasy Erlan Qoshanov zańnamaǵa zańnamany JI-tehnologııalardyń damýyna beıimdemeýdiń saldary týraly paıymyn bildirdi.