Tsıfrlyq shejire, Súıinshi, Kórimdik — Aitu qalaı ózgeredi
ASTANA. KAZINFORM — Qazaqstandyq Aitu platformasy messendjer ǵana emes, azamattar, bıznes pen memleket arasyndaǵy ózara is-qımyldyń biryńǵaı tsıfrlyq alańyna aınalmaq. Úkimet otyrysynda BTS Digital kompanııalar tobynyń basqarýshy dırektory Maqsat Nurıdenuly ulttyq platformany damytýǵa qatysty birqatar jańa bastamany tanystyrdy.
Ulttyq messendjerdi damytýǵa basymdyq berilmek
Spıkerdiń aıtýynsha, búginde qazaqstandyqtardyń basym bóligi sheteldik messendjerlerdi paıdalanady.
— Olarmen birge bizdiń hattarymyz, qujattarymyz ben derekterimiz de sol platformalarǵa ketedi. Bul derekter Qazaqstannan tys jerlerdegi data-ortalyqtarda saqtalady jáne ózge erejelerge baǵynady. Biz tsıfrlyq memleket qurdyq deımiz, alaıda tsıfrlyq memleket óz azamattarymen sheteldik alań arqyly sóılesedi, — dedi Maqsat Nurıdenuly.
Osyǵan baılanysty kompanııa ulttyq tsıfrlyq keńistikti damytýǵa jáne azamattar men memleket arasyndaǵy baılanysty otandyq platforma arqyly qamtamasyz etýge basymdyq berip otyr.
Qazirgi ýaqytta Aitu platformasynda 6,8 mıllıon adam tirkelgen. Aı saıyn qosymshany 1 mıllıonnan astam qazaqstandyq qoldanady, al kúndelikti belsendi aýdıtorııa 100 myńnan asady.
— Degenmen tirkelgender sany men kúndelikti aýdıtorııa arasynda aıyrmashylyq bar. Osy ýaqytqa deıin Aitu aýdıtorııasy qalyptasqan messendjer retinde jumys istedi. Biz endi adamdardyń qosymshaǵa kún saıyn qaıta oralýyna sebep bolatyn múmkindikterdi jasap jatyrmyz, — dedi spıker.
Tsıfrlyq shejire paıda bolady
Kompanııa ókili ulttyq dástúrimizdi, tilimizdi jáne ómir saltymyzdy eskeretin ulttyq messendjer qurylyp jatqanyn basa aıtty. Sondyqtan Aitu-da ár otbasyǵa qajet fýnktsııalar qosylady.
— Búginde Qazaqstanda 8 mıllıonnan astam otbasy bar jáne olardyń basym bóliginde týystarymen qarym-qatynas jasaýǵa arnalǵan ortaq chat jumys isteıdi. Mysaly, onda fotosýretterdi saqtaýǵa, mańyzdy oqıǵalardyń kúntizbesin júrgizýge jáne túrli is-sharalardy uıymdastyrýǵa bolady, — dedi Maqsat Nurıdenuly.
Platformada ulttyq erekshelikterdi eskeretin jańa servıster iske qosylady. Solardyń biri — tsıfrlyq shejire. Bul fýnktsııa paıdalanýshylarǵa óz ata-tegin, áýlet tarıhyn jáne otbasy týraly mańyzdy málimetterdi tsıfrlyq formatta saqtaýǵa múmkindik beredi.
«Súıinshi», «Kórimdik», «Asar» aýdarymdary engiziledi
Aitu-da ulttyq dástúrlerge negizdelgen qarjylyq servıster de iske qosylmaq.
Atap aıtqanda, paıdalanýshylar «Súıinshi», «Kórimdik», «Asar» jáne «Sadaqa» sııaqty tólemderdi arnaıy formatta jibere alady.
Bul qyzmetter aqsha aýdarymdaryn ulttyq mádenıetpen baılanystyryp, rásimdeýdi jeńildetýge baǵyttalǵan.
Qazaq-orys tilderi arasynda avtomatty aýdarma bolady
Qosymshada qazaq tilin damytýǵa erekshe kóńil bólinedi. Jańa múmkindikterdiń biri — qazaq jáne orys tilderi arasyndaǵy avtomatty aýdarma qyzmeti.
Kompanııa ókilderiniń pikirinshe, bul fýnktsııa kópultty Qazaqstan azamattary arasyndaǵy qarym-qatynasty jeńildetýge múmkindik beredi.
Internet-alaıaqtyqpen kúres
Platforma qaýipsizdik máselesine de erekshe kóńil bólmek. Aitu-da verıfıkatsııadan ótken akkaýnttarǵa arnaıy belgi qoıylady. Bul paıdalanýshylarǵa resmı tulǵalar men uıymdardyń shynaıy paraqshalaryn ajyratýǵa kómektesedi.
Mundaı sheshim ınternet-alaıaqtyqpen kúres sharalarynyń bir bóligi retinde usynylyp otyr.
— Qazirgi ýaqytta kóptegen adam jalǵan akkaýnttarǵa, qoldan jasalǵan habarlamalarǵa jáne alaıaqtyq shemalarǵa tap bolyp jatyr. Tek bıylǵy jyldyń alǵashqy jartyjyldyǵynda elimizde 20 myńnan astam ınternet-alaıaqtyq faktisi tirkeldi, — deıdi Maqsat Nurıdenuly.
Mektep, aýla jáne dáriger chattary iske qosylýy múmkin
Bolashaqta Aitu kúndelikti turmystyq máselelerdi sheshýge arnalǵan biryńǵaı tsıfrlyq ortaǵa aınalýy yqtımal. Platformada úı turǵyndarynyń, kórshilerdiń nemese aýdan turǵyndarynyń chattary qurylyp, kommýnaldyq jáne áleýmettik máselelerdi talqylaýǵa múmkindik beriledi.
Sonymen qatar ata-analar, muǵalimder jáne mektep ákimshiligin biriktiretin mektep chattary iske qosylmaq.
— Búginde elimizde 8 myńnan astam mektep bar. Onda 3,9 mıllıon oqýshy bilim alyp, 400 myńnan astam pedagog eńbek etedi. Dárigermen baılanysý úshin resmı chat qoljetimdi bolady. Bul 280 myńnan astam medıtsına qyzmetkeri men mıllıondaǵan azamattyń ózara baılanysyn jeńildetedi, — dedi spıker.
Áleýmettik salaǵa erekshe kóńil bólinedi. Qazaqstanda 750 myńǵa jýyq múgedektigi bar adam turady. Olar úshin aqparat pen qoldaý sharalaryna yńǵaıly ári qoljetimdi qol jetkizý mańyzdy. Aldaǵy ýaqytta platformada sport, salaýatty ómir salty jáne ákimshilik qyzmetter salasyndaǵy servıster damymaq.
eGov GPT memlekettik qyzmet alýǵa kómektesedi
Platformadaǵy mańyzdy jańalyqtardyń biri — eGov GPT tsıfrlyq kómekshisin engizý. Jasandy ıntellekt negizinde jumys isteıtin servıs paıdalanýshylarǵa qajetti memlekettik qyzmetti tabýǵa, ótinish rásimdeýge jáne qajetti aqparatty alýǵa kómektesedi.
Osylaısha memlekettik qyzmetterdiń bir bóligi chat formatynda qoljetimdi bolýy múmkin.
Kompanııa málimetinshe, jyl sońyna deıin Aitu-dyń aı saıynǵy aýdıtorııasyn 1,5 mıllıon adamǵa deıin jetkizý kózdelip otyr. Al 2027 jyly bul kórsetkishti 3,8 mıllıonnan asyrý josparlanǵan.
Usynylǵan bastamalar Aitu platformasyn qarapaıym messendjerden ulttyq tsıfrlyq ekojúıege aınaldyrýdy kózdeıdi. Jańa servıster iske qosylǵan jaǵdaıda qazaqstandyqtar memlekettik qyzmetterden bastap kúndelikti turmystyq máselelerge deıingi kóptegen protsesti bir qosymsha arqyly sheshe alady.
Aıta keteıik, elimizde eGov, e-Otinish qyzmetteri men Aitu messendjeri tarıfsiz qoljetimdi bolady.
