Tsıfrlyq saıasattaǵy tartys: Brıýssel men Vashıngton nege kelise almaı otyr
ASTANA. KAZINFORM – Eýropalyq odaqtyń tsıfrlyq saıasat salasyndaǵy zańnamasyna qarsy baǵyttalǵan «sóz bostandyǵy» týraly amerıkalyq rıtorıka Eýropada jıi ótkir reaktsııa týǵyzady, dep jazdy Euronews.
Sarapshylardyń pikirinshe, Atlant muhıtynyń eki jaǵyndaǵy taraptar birin-biri estimeı, óz ustanymyn qorǵaýmen shektelip otyr.
Eýropalyqtar úshin AQSh Konstıtýtsııasyna engiziletin túzetýler qanshalyqty mańyzdy bolsa, amerıkalyqtar úshin EO dırektıvalary men reglamentteri de shamamen sonshalyqty mánge ıe. ıAǵnı, asa qyzyǵýshylyq týdyrmaıdy. Soǵan qaramastan, tsıfrlyq tehnologııalardy retteý máselesinde eki taraptyń sheshimderi bir-birine tikeleı áser etedi.
AQSh ustanymy neden týyndaıdy? Áleýmettik jeliler men tsıfrlyq platformalar jahandyq aýdıtorııaǵa baǵyttalyp jasalady. Sondyqtan EO qabyldaǵan kez kelgen jańa retteý sharasy platformalardyń dızaıny men algorıtmderine yqpal etip, janama túrde amerıkalyq qoldanýshylardyń da «sóz bostandyǵyna» áser etýi múmkin.
Buǵan qosa, EO-nyń «Brıýssel áseri» dep atalatyn jahandyq normatıvtik yqpalǵa umtylysy, AQSh-tyń EO-men qyzmet kórsetý salasyndaǵy saýda profıtsıti jáne tsıfrlyq erejelerdiń keı tustaryndaǵy quqyqtyq belgisizdik te amerıkalyqtardyń alańdaýshylyǵyn kúsheıtedi.
Eýropanyń da óz ýáji bar. 450 mıllıon tutynýshysy bar naryq óz qundylyqtary men qaǵıdattaryna sáıkes erejeler belgileýge quqyly. Bul tsıfrlyq ortada derekterdi qorǵaý, jalǵan aqparatpen kúres jáne platformalardyń jaýapkershiligin arttyrý sekildi máselelerge qatysty. Sonymen qatar Eýropada retteýdi jeńildetý týraly bastamalar da bar, alaıda mundaı usynystar jıi qarsylyqqa ushyraıdy. Óıtkeni qalyptasqan normatıvtik júıe aıasynda jumys isteıtin sarapshylar men konsýltanttar qaýymy da bul qurylymdy saqtaýǵa múddeli.
Sarapshylardyń aıtýynsha, eki tarap arasyndaǵy pikirtalas sońǵy jyldary tipti kúrdelene tústi. Pafosty málimdemeler men ózara aıyptaýlar pragmatıkalyq dıalogqa kedergi keltirip otyr. Al jahandyq ekonomıka jaǵdaıynda tolyq «ajyraý» nemese tehnologııalyq oqshaýlaný shynaıy stsenarıı emes.
Osyǵan baılanysty sarapshylar transatlantıkalyq tehnologııalyq áriptestikti uzaqmerzimdi perspektıvada qarastyrýdy usynady. Álemdik básekelestik, ásirese Qytaı men Reseıdiń tehnologııalyq yqpaly aıasynda, AQSh pen EO-nyń úılesimdi yntymaqtastyǵy eki tarap úshin de strategııalyq mańyzǵa ıe.
Mamandardyń pikirinshe, ózara senim men naqty dıalogsyz bul teketires eki jaqqa da ekonomıkalyq jáne saıası shyǵyn ákelýi múmkin.
Aıta keteıik, Tramp AQSh ımportyna jahandyq tarıfter týraly sheshimin ózgertti.