Memleket basshysy: Tsıfrlyq saýattylyqty balalarǵa mektepten bastap úıretken durys
ASTANA. KAZINFORM — Prezıdent zaman talabyna saı damyǵan, ozyq el bolýǵa úndep, bilim berý isindegi tsıfrlandyrý máselesine nazar aýdardy, dep habarlaıdy Aqordanyń baspasóz qyzmeti.
— Tsıfrlandyrý jáne jasandy ıntellekt tehnologııasy — qazirgi zamannyń aqıqaty. Sol sebepti men bıylǵy halyqqa Joldaýymdy osy ózekti máselege arnadym. Tsıfrlyq saýattylyqty balalarǵa mektepten bastap úıretken durys. Oqýshylar ozyq tehnologııany oqýda tıimdi paıdalana bilgeni jón. Bul — ustazdarǵa da qatysty másele. Muǵalimder zamanaýı daǵdylardy jetik meńgerýi qajet. Jasandy ıntellektini bilim salasynda keńinen paıdalanǵan abzal. Tsıfrlyq el bolý — bir kúnniń sharýasy emes. Qarapaıym tilmen aıtqanda, bul — mektepten bastap túbegeıli jańa tásilmen jumys isteý degen sóz. Sizder, qurmetti ustazdar, osy mańyzdy mıssııany júzege asyrýǵa atsalysyp, belsene jumys isteısizder dep senemin, — dedi Memleket basshysy.
Qasym-Jomart Toqaev elimizdiń memlekettik saıasatynda «Zań jáne tártip» qaǵıdasy ústemdik quratynyn jetkizip, ony júıeli júzege asyrý nátıje bere bastaǵanyna toqtaldy.
— 2019 jyldan beri qylmystyq quqyqbuzýshylyqtyń sany eki ese qysqardy. Ýákiletti organdar bul baǵyttaǵy keshendi jumysty jalǵastyrýy kerek. Qoǵamda joǵary quqyqtyq mádenıet qalyptastyrýda Oqý-aǵartý mınıstrligi men pedagogter aıryqsha ról atqarady. Sebebi ádildik, zań jáne tártip qaǵıdattary mektep partasynan bastap ornyǵýy qajet. Osylaı ǵana biz óskeleń urpaqtyń úılesimdi damýyn qamtamasyz etip, shyn máninde Qaýipsiz, Qýatty jáne Ádiletti Qazaqstandy qura alamyz, — dedi Prezıdent.
Budan buryn Toqaevaldaǵy Ustazdar kúnimen quttyqtap, ustazyn ulyqtaǵan eldiń urpaǵy sanaly, bolashaǵy jarqyn bolary haq ekenin aıtty.