Tsıfrlyq salada bıýrokratııaǵa jol berýge bolmaıdy – Premer-mınıstr

- Memleket basshysy jasandy ıntellektiniń yqpalymen ekonomıkanyń barlyq salasynda jáne jalpy adam ómirinde túbegeıli ózgerister bolyp jatqanyn atap ótti. Sondyqtan jańa tehnologııalar men servıster ozyq qarqynmen damýǵa tıis. «Digital Qazaqstan» strategııasyn biz aıtarlyqtaı tsıfrlyq bazamen iske asyrýǵa kiristik. El aýmaǵyn ınternetpen qamtý deńgeıi joǵary boldy, elektrondyq qyzmetter men servıster keńinen qoldanylyp jatyr. Osynyń barlyǵy endi jekelegen protsesterdi tsıfrlandyrý kezeńinen memleketti damytýdyń jappaı tsıfrlyq modeliniń biryńǵaı júıesine kóshýge múmkindik beredi. Qazirgi tańda memlekettik qyzmetterdi kórsetý formaty edáýir jeńildetildi. Kóptegen servısterdi «bir ǵana batyrmany basý» arqyly alýǵa bolady. Halyqqa qyzmet kórsetý ortalyqtary da jańa formatqa kóship jatyr. Jasandy ıntellekt mınıstrligi júrgizilip jatqan jumys qarqynyn arttyra túsýi kerek, - dedi O.Bektenov.

Onyń aıtýynsha, memlekettik qyzmetterdiń ekojúıesi odan ári proaktıvti túrde damýy kerek, ıaǵnı, azamattarǵa qyrýar ótinish jiberýdiń qajeti bolmaıtyndaı jaǵdaı jasalýǵa tıis.

- Tsıfrlyq salada da basy artyq bıýrokratııaǵa jol berýge bolmaıdy. Ol úshin, eń aldymen, túrli salalardaǵy birqatar máseleni sheshý qajet. Energetıka salasynda energııa júıesin tsıfrlandyrý deńgeıi áli de jetkiliksiz. Ony tolassyz telemetrııanyń, ıntegratsııalanǵan derekter men taldaý quraldardyń joqtyǵynan baıqaýǵa bolady. Jańa jobalar osy máseleni sheshýge baǵyttalǵan. Energııa júıesi boljamdy tsıfrlyq algorıtmder negizinde basqarý qaǵıdatyna kóshýge tıis. Bul ártúrli jaǵdaılarǵa qarsy shuǵyl áreket etýge, apattardyń aldyn alýǵa jáne energııa nysandary jumysynyń senimdiligin arttyrýǵa múmkindik beredi. Osyǵan baılanysty Energetıka mınıstrligi derekterdi Energy Command Center-ge shyǵaryp, salanyń negizgi nysandary men aqparattyq júıelerin biryńǵaı tsıfrlyq kontýrǵa biriktirýi qajet, - dedi Úkimet basshysy.

Premer-mınıstrdiń sózine qaraǵanda, osy jyldyń sońyna deıin negizgi nysandarǵa tsıfrlyq túgendeý júrgizip, salalyq derekterdiń quramyna, sapasy men berilýine qoıylatyn biryńǵaı talaptardy bekitý kerek. Munaı-gaz salasynda sarqylyp bitýge taıaǵan ken oryndary men alynýy qıyn qorlardy ıgerý jaǵdaıynda rentabeldilik pen tehnologııalyq tıimdilikti saqtaý máselesi ótkir tur.

- Jasandy ıntellekt jáne ken oryndarynyń tsıfrlyq telnusqalary tehnologııalaryn qoldaný is júzinde tıimdiligin kórsetip otyr. Sondyqtan olar óndiristik protsesterdi basqarýdyń negizgi standartyna aınalýǵa tıis. Energetıka mınıstrligine «Samuryq-Qazyna» qorymen jáne «QazMunaıGaz» kompanııasymen birlesip, osy sheshimderdiń barlyq óndiristik aktıvterde keńinen qoldanylýyn qamtamasyz etýdi tapsyramyn. 2028 jyldyń sońyna deıin 12 negizgi ken ornynda tsıfrlyq telnusqalardy tolyq iske qosý qajet, - dedi O.Bektenov.

Buǵan deıin habarlanǵandaı, qalalyq servısterdi basqarý boıynsha Astana tájirıbesi el óńirlerinde engiziledi.