Tsıfrlyq patrýl: polıtsııa drondary myńdaǵan quqyqbuzýshylyqty áshkereledi
ASTANA. KAZINFORM — Іshki ister mınıstrliginde polıtsııa jumysynyń tıimdiligin arttyrýǵa jáne azamattardyń qaýipsizdigin qamtamasyz etýge baǵyttalǵan drondar tárizdi tsıfrlyq tehnologııalardy júıeli túrde engizý jumysy jalǵasyp keledi, dep habarlaıdy Polisia.kz.
Jol qaýipsizdigi
Pılotsyz ushý apparattary jol qaýipsizdigin qamtamasyz etýde joǵary tıimdi qural retinde tanyldy. Zamanaýı kameralarmen jabdyqtalǵan drondar jol júrisi qaǵıdalarynyń buzylýyn naqty ýaqyt rejıminde tirkep, kúrdeli jol ýchaskelerin baqylaýǵa jáne derekterdi jedel polıtsııaǵa jiberýge múmkindik beredi. 20 shaqyrymǵa deıingi ushý qashyqtyǵy magıstraldar men qoljetimdiligi qıyn aýmaqtardy qosa alǵanda tolyqqandy áýeden patrýldeý júrgizýge jaǵdaı jasaıdy. Drondardyń kómegimen jol qozǵalysy erejeleriniń alty myńnan astam buzýshylyǵy anyqtaldy. Áýeden turaqty baqylaý jol-kólik oqıǵalarynyń aldyn alýǵa jáne yqtımal qaýipti jaǵdaılarǵa der kezinde áreket etýge múmkindik beredi.
Buqaralyq is-sharalardaǵy qoǵamdyq tártip
Kontsertter, sporttyq matchtar jáne merekelik is-sharalar kezinde drondar baqylaýdyń negizgi elementine aınaldy. Kameralar adamdardyń shoǵyrlanǵan jerlerin baqylaıdy, kúdik týdyratyn áreketterdi ýaqytyly anyqtaýǵa múmkindik beredi jáne polıtsııa jasaqtaryn problemalyq aımaqtarǵa jedel jiberýge jaǵdaı jasaıdy. Áýe monıtorıngi qoǵamdyq tártipti qamtamasyz etý jáne polıtsııa kúshterin tıimdi basqarý múmkindikterin aıtarlyqtaı keńeıtedi.
Jedel qyzmet
Pılotsyz ushý apparattary oqıǵa oryndaryn qaraý, joǵalǵan adamdardy izdeý, qylmys izderin qujattandyrý jáne qylmystyq ahýaldy baqylaý barysynda belsendi qoldanylady. Aerofototúsirilim, beınetirkeý jáne naqty ýaqyttaǵy baqylaý jınalatyn dálelderdiń sapasyn arttyryp, tergeý protsesin jedeldetedi. Shymkenttegi «Qarasora» jáne «Quqyqtyq tártip» jedel-aldyn alý is-sharalaryn mysal retinde keltirýge bolady. Sıntetıkalyq esirtki satty dep kúdikke ilingen 44 jastaǵy áıeldiń qozǵalysy dron arqyly baqylaýǵa alyndy. Bul onyń qylmys ústinde ustalýyna múmkindik berdi. Kóliktiń júk salǵyshynan eki keliden astam esirtki tabyldy.
ІІM-niń tsıfrlyq transformatsııasy
Pılotsyz ushý apparattaryn qoldaný — Іshki ister mınıstrliginiń tsıfrlyq transformatsııa baǵdarlamasynyń mańyzdy bóligi. Drondar tek tehnıkalyq jańalyq qana emes, kúndelikti polıtsııa qyzmetinde qoǵamdyq tártipti qamtamasyz etýge, jol qaýipsizdigin arttyrýǵa jáne qylmystardy ashýǵa kómektesetin naqty quralǵa aınaldy.
Osydan buryn kamera joq aımaqtarda kólikterdi drondar baqylaıtyny anyqtaldy.