Tsıfrlyq ortada jeke adamnyń qaýipsizdigi: Májilis jańa kodeksti qaraıdy
ASTANA. KAZINFORM – Parlament Májilisiniń qaraýyna Qazaqstan Respýblıkasynyń Tsıfrlyq kodeksiniń jobasy men ilespe qujattardyń jobasy engizildi.
- Tsıfrlyq kodekstiń jobasy men ilespe zań jobalary Memleket basshysynyń 2023 jylǵy 1 qyrkúıektegi Joldaýyn iske asyrý maqsatynda ázirlendi. Osy kodekstiń jobasyna, sondaı-aq ilespe qujattarǵa Parlament depýtattary bastamashylyq etti. Tsıfrlyq kodekstiń jobasy 10 taraýdan turady. Bul qujat jobalary tsıfrlyq ortadaǵy qatynastardy, onyń ishinde quqyqtyq qatynastar obektileriniń túrleri, tsıfrlyq orta sýbektileri, tsıfrlyq sáıkestendirý jáne baqylaý, táýekelderdi basqarý boıynsha máselelerdi retteýge, tsıfrlyq ortada jeke adamnyń, qoǵamnyń jáne memlekettiń qaýipsizdigin qamtamasyz etýge baǵyttalǵan, - dedi depýtat Nurtaı Sabılıanov Májilistiń jalpy otyrysynda.
Budan basqa memlekettik qyzmet kórsetýdiń qaǵıdattaryn aıqyndaý jáne saqtaý jónindegi tolyqtyrýlar, memlekettik qyzmet kórsetý salasyndaǵy zańnamalyq aktilerde belgilengen talaptardy saqtamaǵany úshin ákimshilik jaýapkershilikti engizý eskerilgen.
- Osy oraıda Májilistiń Ekonomıkalyq reforma jáne óńirlik damý komıteti atalǵan zań jobalary boıynsha qorytyndy ázirleýge daıyn, - dedi depýtat.
Budan buryn habarlanǵandaı, búgin Májilistiń jalpy otyrysynda depýtattar «Qazaqstan Respýblıkasyndaǵy saılaý týraly» Qazaqstan Respýblıkasynyń Konstıtýtsııalyq zańyna ózgerister men tolyqtyrýlar engizý týraly» Konstıtýtsııalyq zańnyń jobasyn qaraýǵa qabyldady.