Tsıfrlyq ońaltý: tehnologııa maman men otbasyǵa qalaı kómektesedi
ASTANA. KAZINFORM — Tsıfrlyq tehnologııalar ońaltý júıesiniń múmkindigin keńeıtip keledi. Búginde ońaltý kómegi ortalyqtaǵy nemese maman kabınetindegi qyzmetpen ǵana shektelmeıdi, dep habarlaıdy Eńbek jáne halyqty áleýmettik qorǵaý mınıstrliginiń baspasóz qyzmeti.
Tsıfrlyq tehnologııalar ońaltýdy úıge jaqyndatady
Zamanaýı tsıfrlyq quraldar ońaltý baǵdarlamasyn úıde jalǵastyra otyryp adamnyń jaǵdaıyndaǵy ózgeristerdi qadaǵalaýǵa, maman men otbasy arasyndaǵy turaqty baılanysty saqtaýǵa jaǵdaı jasaıdy. Osylaısha ońaltý baǵytyn der kezinde anyqtaýǵa múmkindik týady.
Eńbek jáne halyqty áleýmettik qorǵaý mınıstrliginiń Áleýmettik qorǵaý salasyn damytýdyń ulttyq ǵylymı ortalyǵy osyndaı tehnologııalyq sheshimderdi ońaltý salasyna engizip keledi. Negizgi maqsat — maman jumysyn tolyqtyryp, ońaltý kómegin adam men onyń otbasyna qoljetimdi ári jeke qajettilikterge beıim etý.
Ortalyq 2024 jyldan beri «Qazaqstan halqyna» qoǵamdyq qorymen jáne mınıstrlikpen birlesip «QH. Múgedektigi bar balalardy úı jaǵdaıynda ońaltý» jobasyn iske asyryp keledi. Qazir joba Shymkent qalasy men Qyzylorda, Pavlodar jáne Abaı oblystarynda jalǵasyp jatyr. Mańyzdy erekshelikteriniń biri — ońaltý jumysynyń úıde de jalǵasýy. Mamandarmen ótkizilgen sabaqtan keıin bala ózine jeke iriktelgen jattyǵýlardy úıde oryndaıdy. Ata-analar berilgen usynymdar men tapsyrmalardyń oryndalǵanyn tsıfrlyq ońaltý kúndeligine belgileıdi. Al mamandar balanyń jaǵdaıyndaǵy ózgeristerdi qadaǵalap, qajet bolsa, ońaltý baǵdarlamasyn túzete alady. Osynyń arqasynda maman men otbasynyń baılanysy kezekti qabyldaýmen shektelmeı, ońaltý jumysy úzdiksiz jalǵasady.
Soltústik Qazaqstanda balalardy qashyqtan súıemeldeý jobasy iske qosylady
Tsıfrlyq súıemeldeýdiń taǵy bir baǵyty Soltústik Qazaqstan oblysynda synaqtan ótkizilmek. Bul óńirde úıde kórsetiletin arnaýly áleýmettik qyzmetter beıindi mamandardyń qashyqtan qoldaýymen tolyqtyrylady. Alǵashqy kezeńde jobaǵa múgedektigi bar 180-ge deıin balany qamtý josparlanyp otyr. Qatysý erikti, ol úshin balanyń zańdy ókiliniń jazbasha kelisimi qajet. Munda barlyq balaǵa birdeı usynym berý emes, ár balanyń naqty qajettiligine saı jeke súıemeldeý marshrýtyn qurý kózdelgen.
Áleýmettik qyzmetker aldymen balanyń qajettilikterin baǵalaıdy. Odan keıin beıindi mamandarmen birge otbasyǵa qandaı kómek qajet ekenin jáne ony qalaı uıymdastyrý keregin anyqtaıdy. Qajet bolǵan jaǵdaıda logoped, psıholog, ońaltý dárigeri jáne basqa da mamandar jumysqa tartylady.
Tsıfrlyq platforma maman men otbasy arasyndaǵy baılanysty kúsheıtedi
Bul jumysta FSM Social tsıfrlyq platformasy maman men otbasy arasyndaǵy qashyqtan baılanystyń negizgi quraldarynyń birine aınalady. Platforma arqyly mamandar otbasylarǵa onlaın keńes berip, jeke tapsyrmalar men usynymdar joldaıdy, olardyń oryndalýy týraly keri baılanys alady jáne súıemeldeý barysyn qadaǵalaıdy.
Jańa format úıde kórsetiletin qoldanystaǵy arnaýly áleýmettik qyzmetterdi almastyrmaıdy, olardyń kólemin de qysqartpaıdy. Qashyqtan baılanys áleýmettik qyzmetkerdiń jumysyn tolyqtyrady jáne qajet kezde beıindi mamandardy jıirek tartýǵa jaǵdaı jasaıdy. Jobaǵa qatysýshylardy daıarlaý, jeke súıemeldeý marshrýttaryn ázirleý 2026 jylǵy qyrkúıekte bastalady. Negizgi kezeń 2026 jylǵy qazannan 2027 jylǵy sáýirge deıin jalǵasady.
Jobanyń ádisnamalyq súıemeldeýin Áleýmettik qorǵaý salasyn damytýdyń ulttyq ǵylymı ortalyǵy júzege asyrady. Ortalyq beıindi mamandardy tartyp, áleýmettik qyzmetkerlerdi daıarlap, kúrdeli jaǵdaılar boıynsha qoldaý kórsetedi. Joba sońynda jańa formattyń mamandar kómegine qoljetimdilikti qanshalyqty arttyrǵanyna, balalardy súıemeldeý nátıjesi men otbasylarǵa qanshalyqty qolaıly bolǵanyna baǵalaý júrgiziledi.
— Osylaısha, tsıfrlyq ońaltý bir ǵana platforma nemese tehnologııamen shektelmeıdi. Ol — adamnyń qajettiligin baǵalaýdan bastap, jeke marshrýt qurýdy, úıdegi ońaltý jumysyn jalǵastyrýdy, nátıjelerdi qadaǵalaýdy, mamanmen turaqty keri baılanys ornatýdy jáne zamanaýı ońaltý quraldaryn jeke beıimdeýdi qamtıtyn tutas júıe. Tsıfrlyq tehnologııalar mamandy almastyrmaıdy, kerisinshe onyń múmkindigin keńeıtip, kásibı kómekti bala men otbasyǵa jaqyndatady, — dep túıindedi mamandar.
Osyǵan deıin Astanada múgedektikti rásimdeý tártibi jeńildeıtini anyqtaldy.
