Tsıfrlyq obektilerdiń ıelerine jyl saıyn kıberqaýipsizdik aýdıtin júrgizý talaby engizildi
ASTANA. KAZINFORM — Qazaqstanda tsıfrlyq obektilerdiń menshik ıeleri tsıfrlyq júıelerine jyl saıyn kıberqaýipsizdik aýdıtin júrgizýge mindetteledi. Bul týraly Ortalyq kommýnıkatsııalar qyzmetinde ótken brıfıngte QR Jasandy ıntellekt jáne tsıfrlyq damý vıtse-mınıstri Dosjan Musalıev málim etti.
Onyń aıtýynsha, jańa talap tsıfrlyq ınfraqurylymnyń ishki jáne syrtqy qaýip-qaterlerden qorǵalý deńgeıin baǵalaýǵa múmkindik beredi.
— Tsıfrlyq obektilerdiń menshik ıeleri tsıfrlyq júıelerine jyl saıyn kıberqaýipsizdik aýdıtin júrgizýge mindetti. Sonymen qatar asa mańyzdy tsıfrlyq obektiler kıberqaýipsizdik aýdıtiniń qorytyndysy týraly esepti jyl saıyn Aqparattyq qaýipsizdik komıtetine usynýǵa tıis. Buǵan deıin mundaı talap bolǵan joq, — dedi vıtse-mınıstr.
Prezıdent Jarlyǵyn iske asyrý aıasynda asa mańyzdy tsıfrlyq obektilerge memlekettik baqylaý júrgizý fýnktsııasy Ulttyq qaýipsizdik komıtetine berildi.
Bul ózgerister strategııalyq mańyzy bar tsıfrlyq ınfraqurylymnyń ornyqtylyǵy men qaýipsizdigin kúsheıtýge baǵyttalǵan. Vıtse-mınıstrdiń aıtýynsha, mundaı tásil álemniń kóptegen elinde qoldanylady.
Eske salaıyq, buǵan deıin Úkimet kıberqaýipsizdikti qamtamasyz etý qaǵıdalaryn jańartyp, tsıfrlyq ınfraqurylymdy qorǵaý talaptaryn kúsheıtken bolatyn.
