Tsıfrlyq mınıstrlik 4G jıilikterin paıdalanýǵa aýktsıon jarııalady

ASTANA. KAZINFORM — Qazaqstanda 791–801/832–842 MGts jıilikteri boıynsha 4G baılanysyn damytýǵa arnalǵan aýktsıon jarııalandy, dep habarlaıdy Tsıfrlyq damý, ınnovatsııalar jáne aeroǵarysh ónerkásibi mınıstrliginiń baspasóz qyzmeti.

Vedomstvo 791–801/832–842 MGts (10/10 MGts) radıojıilik spektrin paıdalaný quqyǵyna aýktsıon ótkiziletinin habarlaıdy. 

— Atalǵan aýktsıon tórtinshi býyndaǵy uıaly baılanys (4G) jelilerin damytýǵa baǵyttalǵan. Aýktsıon elimizdiń barlyq óńirin, sondaı-aq Astana, Almaty jáne Shymkent qalalaryn qamtıdy. Lottyń bastapqy baǵasy 30 mıllıard teńgeni quraıdy, — delingen mınıstrlik habarlamasynda.

Aýktsıonǵa qatysý úshin úmitkerler kelesi talaptarǵa saı bolýy tıis:

• Qazaqstan Respýblıkasynda tirkelgen zańdy tulǵa bolýy;
• baılanys salasynda keminde 5 jyl tájirıbesi bolýy;
• uıaly baılanys operatorynyń lıtsenzııasy bolýy;
• bankrottyq satysynda bolmaýy;
• kepildik jarnany tolyq kólemde tóleýi.

Ótinimder elektrondy formatta www.gosreestr.kz veb-portaly arqyly qabyldanady.

Ótinimderdi qabyldaý habarlandyrý jarııalanǵan kúnnen bastap 30 kúntizbelik kúnge sozylady.

Aýktsıonnyń ótý ýaqyty 2025 jyldyń qyrkúıegine josparlanǵan.

Budan buryn Tsıfrlyq damý, ınnovatsııalar jáne aeroǵarysh ónerkásibi mınıstri Jaslan Mádıev Qazaqstan Egov portalynan bas tartady degen qaýesetke jaýap berdi.