Tsıfrlyq memleket qurýda derekterdiń róli qandaı – sarapshy
ASTANA. KAZINFORM – Tsıfrlyq memleket qalyptastyrýda memlekettik qyzmetterdi onlaın formatqa kóshirýmen qatar, memlekettik derekterdiń qoljetimdiligi men qyzmet kórsetý úderisin ólsheıtin naqty kórsetkishter júıesin damytý mańyzdy. Bul týraly halyqaralyq sarapshy Rıchard Kerbı AI and Digital Bridge forýmynda aıtty.
Sarapshynyń pikirinshe, tsıfrlandyrýdyń kelesi kezeńi elektrondyq qyzmetterdi usynýmen ǵana shektelmeı, azamattyń memleketpen ózara is-qımylynyń barlyq kezeńin qamtýy tıis.
– GovTech-tiń kelesi deńgeıine ótken kezde áńgime jaı ǵana onlaın qyzmetter týraly emes, tsıfrlyq memleket týraly bolady. Negizgi maqsat – azamatqa búkil joly boıynsha eń tıimdi qyzmet kórsetý, – dedi Rıchard Kerbı.
Onyń aıtýynsha, memlekettik organdar jınaıtyn derekterdiń basym bóligi azamattar men bızneske qoljetimdi bolýy qajet. Bul rette ulttyq qaýipsizdikke jáne jeke medıtsınalyq aqparatqa qatysty derekter erekshe qorǵalýy tıis.
– Memleket sapaly derekter qoryn qalyptastyrǵan kezde úlken múmkindik paıda bolady. Qazir kóptegen jas kásipkerler tehnologııalyq kompanııa qurýǵa umtylyp júr. Alaıda olardyń ári qaraı damýyna qajetti derekter bolmaǵan jaǵdaıda bul úlken kedergige aınalýy múmkin, – dedi sarapshy.
Rıchard Kerbı memlekettik tsıfrlandyrý jobalarynda kórsetkishter júıesiniń de mańyzy zor ekenin atap ótti. Onyń sózinshe, engizilgen júıeniń qanshalyqty tıimdi jumys istep turǵanyn baǵalaý jáne qajet bolǵan jaǵdaıda qosymsha qoldaý kórsetý úshin naqty ólshemder bolýy kerek.
– Júıeni quryp qana qoımaı, onyń jumys istep turǵanyn nemese istemeıtinin ólsheý qajet. Sondaı-aq qandaı deńgeıde qosymsha qoldaý keregin anyqtaý mańyzdy, – dedi ol.
Sarapshy Qazaqstannyń tsıfrlandyrý baǵytyndaǵy jumystaryn da atap ótti.
Onyń aıtýynsha, el bul baǵytqa sońǵy on jylǵa jýyq ýaqyt boıy basymdyq berip keledi jáne osy kezeńdegi progresti baqylaý mańyzdy.
Sonymen qatar ol memlekettik qyzmetterdi jeke-jeke emes, azamattyń tolyq ómirlik jaǵdaıy turǵysynan baǵalaý qajet ekenin aıtty.
– Mysaly, belgili bir ómirlik jaǵdaı kezinde azamatqa bes elektrondy qyzmet qajet bolsa, kóptegen elder osy qyzmetterdiń árqaısysyn bólek baǵalaıdy. Biraq bul azamattyń búkil jolyn kórsetpeıdi. Qyzmetterdiń ózara baılanysyn jáne tolyq protsesti baǵalaý kerek, – dedi Rıchard Kerbı.
Halyqaralyq sarapshy derekterdiń jaı ǵana jarııalanýy jetkiliksiz ekenin, olardyń jasandy ıntellekt júıeleri qoldana alatyndaı qurylymda bolýy qajet ekenin atap ótti.
– Derek mańyzdy. Biraq ol AI-ready, ıaǵnı jasandy ıntellekt qoldanýyna daıyn derek bolýy tıis. Derekterdi jaı ǵana saıtqa júktep qoıý jetkiliksiz, – dep túıindedi spıker.
Aııta keteıik,Qazaqstan AI-ekonomıkanyń barlyq bes deńgeıin damytýdy kózdeıtinin jazǵanbyz.
