Tsıfrlyq memleket qurý máselesine aıryqsha kóńil bólý kerek — Memleket basshysy

ASTANA. KAZINFORM — Úkimet músheleri men ákimder ózderine senip tapsyrylǵan salalar men oblystardaǵy barlyq olqylyqty tsıfrlandyrýǵa «jaba salady». Bul týraly Úkimettiń keńeıtilgen otyrysynda Memleket basshysy Qasym-Jomart Toqaev aıtty.

— Tsıfrlyq memleket qurý máselesine aıryqsha kóńil bólý kerek. Bul Qazaqstannyń bolashaǵyna tikeleı áser etedi. Jańa ǵana bul salanyń elimiz úshin strategııalyq mańyzy týraly aıtyp kettim, barshaǵa túsinikti dep oılaımyn. Sondyqtan jumysqa selqos qarap, jaıbaraqat júrýge bolmaıdy. Áıtpese, qoldaǵy múmkindikten aıyrylyp qalamyz. Tsıfrlyq tásilder arqyly artyq shyǵyndy qysqartyp, ákimshilik kedergilerdi eńsere alamyz. Basqarý isindegi tıimsiz sheshimderdi barynsha azaıtýǵa bolady, — dedi Memleket basshysy.

Prezıdenttiń paıymynsha, jasandy ıntellektti tolyqqandy engizý búkil tsıfrlandyrý saıasatynyń ózegi bolýy tıis.

— Jasandy ıntellektke negizdelgen asa mańyzdy tsıfrlyq jobalardy júzege asyrý máselesin aıryqsha nazarda ustaý kerek. Úkimet mundaı jobalardy tolyq ári ýaqtyly qarjylandyrý úshin negizgi basymdyqtardy naqty belgilep alýy qajet. Áıtpese, aýqymdy jospardyń bári qaǵaz júzinde qalyp qoıady. Aldymyzda aıqyn baǵdar bolmasa, qandaı strategııamen de maqsatqa jetý ońaı bolmaıdy. Sonymen qatar taǵy bir kemshilik kózge anyq kórinedi. Úkimet músheleri men ákimder ózderine senip tapsyrylǵan salalar men oblystardaǵy barlyq olqylyqty tsıfrlandyrýǵa «jaba salady». «Jappaı tsıfrlandyrý engizilse, Siz kórsetken olqylyqtar men kemshilikter ózdiginen joıylady» deıdi. Bul arada ne aıtýǵa bolady? Adamdar ózin qorǵaýdyń, basyn arashalap alýdyń nebir quıtyrqy ádisin tabady, — dedi Qasym-Jomart Toqaev.

Buǵan deıin Prezıdent salyq júıesin jappaı tsıfrlandyrýǵa shuǵyl kirisken jón ekenin aıtqan edi.