Tsıfrlyq maınıng pen elektr energııasyna qatysty másele qalaı sheshiledi
ASTANA. KAZINFORM – Búgin Úkimet otyrysynda Jasandy ıntellekt jáne tsıfrlyq damý vıtse-mınıstri Ǵızzat Baıtursynov tsıfrlyq maınıng pen elektr energııasyna qatysty qandaı joba iske asatanyn aıtty.
- 18 shildede Úkimet strategııalyq tsıfrlyq maınıng mehanızmin bekitti. Mehanızm boıynsha ınvestor óz qarajatyna jabdyq ákelip, derekterdi óńdeý ortalyǵyn salady. Energııany elektr stantsııadan tikeleı shart arqyly satyp alady. Baǵa elektr stantsııasynyń qoldanystaǵy tarıfi boıynsha belgilenedi. Bul rette elektr stantsııasy tarapynan qosymsha shyǵyndar nemese jeńildikter talap etilmeıdi. Onyń ornyna maınerler óndirilgen tsıfrlyq aktıvterdiń 10%-yn krıptorezervke beredi. Jobanyń jalpy josparlanǵan qýaty 300 megavatt. 12 qyrkúıekte qýaty 90 megavatt bolatyn alǵashqy strategııalyq tsıfrlyq maınıng jobasy iske qosyldy. Jospar boıynsha, bul jobanyń 7 jyl ishindegi jalpy ekonomıkalyq áseri 156 mln AQSh dollaryn quraıdy, - dedi Ǵ. Baıtursynov.
Kelesi baǵyt - «70/30» baǵdarlamasy. Baǵdarlamanyń maqsaty - jańa elektr qýatyn salýǵa jeke ınvestıtsııa tartý. Bul joba aıasynda ınvestordyń jańa stantsııa salýǵa nemese qoldanystaǵy stantsııanyń qýatyn arttyrýǵa múmkindigi bar. Kóbeıtilgen qýattyń 70 paıyzyn ınvestor maınerlerge jáne basqa da iri tutynýshylarǵa tikeleı sata alady. Al qýattyń qalǵan bóligi Ulttyq energetıkalyq júıesine beriledi.
- Osylaısha, tsıfrlyq maınıng elektr energııasyna qosymsha suranys qalyptastyrady. Bul jańa generatsııa salýǵa jáne ınvestıtsııa tartýǵa múmkindik beredi. Qazirgi tańda osy jobaǵa qyzyǵýshylyq tanytqan ınvestor aıqyndaldy. Onyń jospary boıynsha Ekibastuz qalasynda 100 megavatt kóleminde jańa qýat kózin salý kózdelgen. Investıtsııa kólemi shamamen 65 mlrd teńgeni quraıdy, - dedi vıtse-mınıstr.
Budan buryn habarlanǵandaı, elimizde 76 lıtsenzııalanǵan maıner bar.
