Tsıfrlyq qujattarmen balabaqshaǵa qabyldaý jeńildeı tústi

ASTANA. KAZINFORM — Qazaqstanda mektepke deıingi uıymdarǵa (balabaqsha) balalardy qabyldaý jyl boıy júzege asyrylady, dep habarlaıdy Oqý-aǵartý mınıstrligi.

Memlekettik qyzmetter jergilikti atqarýshy organdar arqyly nemese «Elektrondyq úkimet» veb-portaly arqyly kórsetiledi.

Mektepke deıingi uıymǵa joldama alý jáne qujattardy tapsyrý úshin ata-analar nemese zańdy ókilderi kelesi qujattar toptamasyn usynýy qajet:

1. Qabyldaýǵa arnalǵan joldama;

2. Ótinish;

3. Qyzmet alýshynyń jeke basyn kýálandyratyn qujat (ata-anasynyń biriniń nemese zańdy ókiliniń) nemese elektrondyq qujattar qyzmetinen alynǵan tsıfrlyq nusqasy;

4. Balanyń týý týraly kýáligi nemese tsıfrlyq qujattar servısinen alynǵan elektrondyq nusqasy;

5. №065/E nysanyndaǵy profılaktıkalyq egý kartasy;

6. №052-2/Ý nysanyndaǵy balanyń densaýlyq pasporty;

7. №027/Ý nysandy anyqtama;

8. Psıhologııalyq-medıtsınalyq-pedagogıkalyq konsýltatsııanyń qorytyndysy
   (erekshe bilim berý qajettiligi bar balalar úshin).

Mamandardyń túsindirýinshe, barlyq qajetti qujattardy tsıfrlyq formatta alý múmkindigi ata-analar úshin protsesti jeńildetip, qujat jınaý ýaqytyn qysqartady.

- Qazirgi tańda balabaqshaǵa qabyldaýǵa ótinish berý jáne joldama alý rásimi tolyqtaı avtomattandyrylǵan ári ata-analar úshin qoljetimdi qyzmet túrine aınalǵan, - dep jazdy mınıstrlikten.

Aıta keteıik, elimizde az qamtylǵan otbasylardyń balalary balabaqshada tegin tamaqtanady.