Tsıfrlyq kodeks Prezıdent belgilegen merzimde qabyldanady — Mádıev

ASTANA. KAZINFORM — Qazaqstannyń Tsıfrlyq kodeksi Memleket basshysy belgilegen merzimde qabyldanady. Bul týraly QR Tsıfrlyq damý, ınnovatsııalar jáne aeroǵarysh ónerkásibi mınıstri Jaslan Mádıev aıtty.

— Tsıfrlyq kodeksti Parlament Májilisi qarap jatyr. Ony pysyqtaý Májilis janynan qurylǵan quzyretter ortalyǵynyń negizinde júrgizilýde. Kodeks jobasy qazaq, orys jáne aǵylshyn tilderinde GitHub saıtynda jarııalanady. Qujat Memleket basshysy belgilegen merzimde qabyldanatyn bolady, — dedi ol Úkimet otyrysynda jasaǵan baıandamasynda. 

Sondaı-aq ol «Alatau City» qalasyna qatysty tsıfrlyq jobalary jaıly aıtty.

— «Alatau City» tsıfrlyq qalasy boıynsha jasandy ıntellekt tehnologııalaryn qoldana otyryp, Smart City arhıtektýrasy ázirlenedi, sondaı-aq onyń ekojúıesinde krıptovalıýtany paıdalaný úshin qajetti NQA daıyndalady, — dedi mınıstr.

Aıta keteıik, kúni keshe Memleket basshysy Qasym-Jomart Toqaev óz Joldaýynda Qazaqstandy úsh jylda tsıfrlyq derjavaǵa aınaldyrýdy tapsyrdy. Bul maqsatqa elimiz qanshalyqty qol jetkize alady, osy másele jaıly Kazinform agenttigi sarapshylar pikirin jarııalaǵan edi.