Tsıfrlyq kodeks: Qazaqstandyqtar óz erkin «tsıfrlyq rastaý» tásili arqyly da bildire alady

ASTANA. KAZINFORM — Tsıfrlyq kodeks elektrondy tsıfrlyq qoltańbanyń quqyqtyq mártebesin elektrondy formatta qol qoıýdyń jalǵyz tásili dep bekitedi. Zań jobasyn áriptesterine tanystyrǵan depýtat Ekaterına Smyshlıaeva osyndaı málimet berdi. 

— Jańa Tsıfrlyq kodeks azamattardyń onlaın keńistiktegi is-qımyldaryn zańda naqtylaı túsedi. Endi jeke tulǵany rastaý júıesi kúsheıip, kópfaktorly jáne bıometrııalyq tásilder (saýsaq izi, bet beıne, daýys) zań júzinde qoldanylady.

Sonymen birge elektrondy tsıfrlyq qoltańba (ETsQ) burynǵydaı resmı qujattarǵa qol qoıýdyń jalǵyz zańdy quraly retinde saqtalady. Alaıda, mańyzdy emes áreketter úshin jańa, jeńildetilgen «tsıfrlyq rastaý» engiziledi, — dedi ol.

Al keıbir platformada onlaın qyzmetti paıdalanýǵa kelisim berý úshin tsıfrlyq rastaý tetigin qoldanýǵa bolady.

Sondaı-aq, kodeks jobasynda qoldanystaǵy elektrondy qujattardy zań tilinde úsh topqa bólý kózdelip otyr. Birinshisi — elektrondy qujattar. Oǵan tek ETsQ qoıylǵan qujattar jatady jáne qaǵaz nusqamen teńestiriledi. Ekinshisi — tsıfrlyq qujattar. Bul memlekettik bazalardan avtomatty túrde júkteýge bolatyn, kórsetilgen sátinde túpnusqa bolyp sanalatyn túrli anyqtamalardyń quqyqtyq ataýy deýge bolady. Úshinshisi — tsıfrlyq málimetter. JSN arqyly ІІM bazasynan alynǵan azamat týraly derek, ne bolmasa jyljymaıtyn múlik reestrindegi jazbalar osy tsıfrlyq málimetterge jatqyzylmaq. Basqasha aıtsaq, resmı derekkózderden alynǵan zańdy máni bar aqparattar osy sanatqa jatqyzylady.

Ekaterına Smyshlıaeva bul ózgerister azamattar men uıymdardyń tsıfrlyq ortada qoltańba qoıý, derek usyný jáne qujat almasý tártibin jeńildetip, quqyqtar men mindetterdi naqtylaı túsetinin aıtady.

Aıta ketý kerek, osy kodeksti qabyldaý arqyly tsıfrlyq derekterdi zań júzinde múlik retinde moıyndaý usynylyp otyr.