Tsıfrlyq kodeks, Digital Qazaqstan, JI týraly zań — Tsıfrmınge shuǵyl tapsyrmalar berildi

ASTANA. KAZINFORM — Premer-mınıstr Oljas Bektenov Tsıfrlyq damý, ınnovatsııalar jáne aeroǵarysh ónerkásibi mınıstrligine Memleket basshysynyń Joldaýynda aıtylǵan bastamalar boıynsha birqatar naqty tapsyrma berdi. 

— Tsıfrlyq damý mınıstrligi Parlament qabyrǵasynda Tsıfrlyq kodekstiń jáne «Jasandy ıntellekt týraly» zań jobalarynyń pysyqtalýyn jedeldetsin. Budan bólek, tsıfrlandyrýdy jáne jasandy ıntellektini damytý jónindegi «Digital Qazaqstan» tujyrymdamalyq qujatyn ázirleýge kirisý kerek. Atalǵan qujat salanyń aldaǵy úsh jylǵa arnalǵan negizgi baǵyttaryn qamtyp, jaýapkershiliktiń ara-jigin naqty bólip berýi qajet. Buǵan qosa, qujatta tıisti nátıjeler de kórinis tabýy kerek, — dedi ol Úkimet otyrysynda.

Odan bólek, Úkimet basshysy vedomstvony qaıta qurylymdaýǵa da qamdanýdy tapsyrdy.

— Tsıfrlandyrý mınıstrligi qaıta uıymdastyrý jáne Jasandy ıntellekt jáne tsıfrlyq damý mınıstrligin qurý týraly Prezıdent Jarlyǵynyń jobasyn engizýge tıis, — dedi Bektenov.

Aıta keteıik, buǵan deıin Premer-mınıstr eldiń ekonomıka blogyna 10 naqty tapsyrma júktegen edi.